კენ ვოლკერის საერთაშორისო უნივერსიტეტში გვჯერა, რომ ემპათია მხოლოდ ადამიანური თვისება კი არა, უმნიშვნელოვანესი კლინიკური კომპეტენციაა, რომლის განვითარებაც პროფესიონალი ექიმის ფორმირების აუცილებელ წინაპირობას წარმოადგენს.
ინოვაციური სასწავლო პროგრამის ფარგლებში, მესამე კურსის სტუდენტები გადიან ემპათიის კურსს, რომელსაც კვსუ-ის მოწვეული ლექტორი, თეატრის, კინოს, გახმოვანებისა და დუბლირების მსახიობი ვლადიმერ ნოვოსარდოვი ხელმძღვანელობს.
პროგრამის საწყის ეტაპზე სტუდენტები, მსახიობის პროფესიული მეთოდოლოგიის გამოყენებით, ირგებენ როგორც პაციენტის, ისე ექიმის როლებს. ისინი ეუფლებიან კომუნიკაციის უნარებს ემოციურად დატვირთულ და სენსიტიურ სცენარებში, რომლებიც რეალურ კლინიკურ ისტორიას ასახავს.
„სტუდენტს ეძლევა შესაძლებლობა, რეალურად იგრძნოს, რას ნიშნავს პაციენტის პოზიციაში ყოფნა, - ეს კი განსაკუთრებით მნიშვნელოვანია ეთიკური დილემებისა და რთული შემთხვევების გააზრებისთვის. სამსახიობო ტექნიკის გამოყენებით ვავითარებთ იმ პროფესიულ კომპეტენციებს, რომლებიც აუცილებელია ექიმის პრაქტიკაში. ხელოვნებისა და მედიცინის შერწყმა სტუდენტებს აძლევს შესაძლებლობას, მართონ რთული სიტუაციები, სწორად შეაფასონ პაციენტის ემოციური მდგომარეობა და შეარჩიონ შესაფერისი საკომუნიკაციო მიდგომა,“ - აღნიშნავს ვლადიმერ ნოვოსარდოვი.
ვლადიმერ ნოვოსარდოვი თეატრისა და კინოს მსახიობი და ალექსანდრე გრიბოედოვის დრამატული თეატრის წამყვანი არტისტია. მრავალი წლის განმავლობაში აქტიურად მოღვაწეობს როგორც სცენაზე, ისე ეკრანზე და მის მიღმა. იგი, ასევე, ეწევა გახმოვანებისა და დუბლირების პროფესიულ საქმიანობას მსოფლიოს წამყვანი სტუდიებისა და მედიაკომპანიებისთვის, მათ შორის Netflix, Disney, Universal Pictures, Warner Brothers და სხვა. გასულ წელს, კანადაში გამართულ ბრამპტონის საერთაშორისო ნოლივუდის ფილმის ფესტივალზე, ვლადიმერ ნოვოსარდოვმა მოკლემეტრაჟიან ფილმში -„The Monopol“ - მთავარი როლის შესრულებისთვის მიიღო „საუკეთესო მამაკაცი მსახიობის“ ჯილდო და ჟიურის სპეციალური პრიზი.
ვლადიმერი შოთა რუსთაველის თეატრისა და კინოს სახელმწიფო უნივერსიტეტის კურსდამთავრებულია და პროფესიულ განათლებას დაეუფლა ავთანდილ ვარსიმაშვილის სახელოსნოში, საერთაშორისო აღიარების მქონე რეჟისორთან და პედაგოგთან, გრიბოედოვისა და თავისუფალი თეატრების სამხატვრო ხელმძღვანელთან. მრავალწლიანი გამოცდილება თეატრსა და კინოში ვლადიმერს საშუალებას აძლევს, შემოქმედებითი პედაგოგიკის უნიკალური მეთოდებით ხელი შეუწყოს მომავალ ექიმებში პაციენტის ემოციური გამოცდილების სიღრმისეულად აღქმასა და ჰუმანური კომუნიკაციის მაღალი სტანდარტების განვითარებას.
ემპათიის კურსის ტრენინგები უკვე მიმდინარეობს კენ ვოლკერის საერთაშორისო უნივერსიტეტის მესამე კურსის სტუდენტების ნაწილთან და ეტაპობრივად სრულად ინტეგრირდება კვსუ-ის სამედიცინო საგანმანათლებლო პროგრამაში.
კენ ვოლკერის საერთაშორისო უნივერსიტეტში ვზრდით მომავალ ექიმებს, რომელთა პროფესიული ძალა ცოდნასა და ემპათიის უნარის ერთიანობაშია.