კენ ვოლკერის საერთაშორისო უნივერსიტეტის სტუდენტები საერთაშორისო დეპარტამენტის წარმომადგენელს შეხვდნენ და Erasmus+-ის გაცვლითი პროგრამების შესახებ მიიღეს ინფორმაცია.
შეხვედრაზე სტუდენტებმა გაიგეს, რას გულისხმობს საერთაშორისო აკადემიური მობილობა, როგორ შეუძლიათ გაცვლით პროგრამებში მონაწილეობა და რას უნდა მიაქციონ ყურადღება განაცხადის მომზადებისას. საუბარი შეეხო კონკურსის პირობებს, შერჩევის ეტაპებს, საჭირო დოკუმენტაციასა და უცხო ენის ცოდნის მნიშვნელობას.
განსაკუთრებული ყურადღება დაეთმო საზღვარგარეთ სწავლის გამოცდილებას – განსხვავებული საგანმანათლებლო გარემოს გაცნობას, პროფესიული კონტაქტების დამყარებასა და სხვადასხვა კულტურის წარმომადგენლებთან თანამშრომლობას. ასეთი გამოცდილება სტუდენტებს ეხმარება დამოუკიდებლობის განვითარებაში, ენობრივი უნარების გაუმჯობესებასა და საკუთარი აკადემიური თუ პროფესიული ინტერესების უკეთ განსაზღვრაში.
სტუდენტებს შესაძლებლობა ჰქონდათ, დაესვათ შეკითხვები დეპარტამენტის მენეჯერისთვის, სალომე ქეშელაშვილისთვის და მიეღოთ განმარტებები პროგრამაში მონაწილეობისა და მოსამზადებელი ნაბიჯების შესახებ.
კენ ვოლკერის საერთაშორისო უნივერსიტეტი ხელს უწყობს სტუდენტების საერთაშორისო შესაძლებლობების შესახებ ინფორმირებასა და მათ ჩართულობას გაცვლით პროგრამებში, რომლებიც სწავლისა და განვითარების ახალ პერსპექტივებს ქმნის.