კენ ვოლკერის საერთაშორისო უნივერსიტეტში მნიშვნელოვანი აკადემიური ვიზიტი გაიმართა. უნივერსიტეტს ემორის უნივერსიტეტის მედიცინის სკოლის მიკრობიოლოგიისა და იმუნოლოგიის ემერიტუსი პროფესორი, გორდონ ჩერჩვორდი სტუმრობდა.
ვიზიტის ფარგლებში პროფესორი ჩერჩვორდი შეხვდა კვსუ-ის სტუდენტებს და გაუზიარა მრავალწლიანი აკადემიური და კლინიკური გამოცდილება. შეხვედრა ინტერაქციულ ფორმატში წარიმართა, რაც სტუდენტებს შესაძლებლობას აძლევდა, აქტიურად ჩართულიყვნენ დისკუსიაში და მიეღოთ უშუალო პასუხები მათთვის მნიშვნელოვან კითხვებზე.
პროფესორმა განსაკუთრებული ყურადღება გაამახვილა პროფესიონალიზმის მნიშვნელობაზე სამედიცინო კარიერაში. მისი თქმით, ექიმის პროფესია არა მხოლოდ ცოდნას, არამედ მაღალი ეთიკური სტანდარტების დაცვას, პასუხისმგებლობასა და პაციენტზე ორიენტირებულ მიდგომას მოითხოვს. მან სტუდენტებს მოუწოდა, ადრეული ეტაპიდანვე ჩამოაყალიბონ პროფესიული იდენტობა და მუდმივად იზრუნონ თვითგანვითარებაზე.
შეხვედრის ერთ-ერთი მთავარი თემა დროის ეფექტური მართვა იყო. პროფესორმა სტუდენტებს გაუზიარა პრაქტიკული რჩევები, თუ როგორ დააბალანსონ ინტენსიური სასწავლო პროცესი, კლინიკური პრაქტიკა და პირადი ცხოვრება. მან ხაზი გაუსვა პრიორიტეტების სწორად განსაზღვრისა და დისციპლინის მნიშვნელობას, რაც წარმატების მიღწევის ერთ-ერთი მთავარი წინაპირობაა.
გორდონ ჩერჩვორდმა ასევე ისაუბრა თანამედროვე მედიცინის გამოწვევებზე, კვლევის როლსა და იმ უნარებზე, რომლებიც მომავალ ექიმებს კონკურენტუნარიანს ხდის საერთაშორისო სამედიცინო სივრცეში. მან სტუდენტებს ურჩია, აქტიურად ჩაერთონ კვლევით საქმიანობაში, განავითარონ კრიტიკული აზროვნება და არ შეწყვიტონ სწავლა პროფესიული კარიერის განმავლობაში.
ვიზიტის დასასრულს გაიმართა კითხვა-პასუხის სესია, სადაც სტუდენტებმა მიიღეს ინდივიდუალური რჩევები კარიერული განვითარების, საერთაშორისო შესაძლებლობებისა და სამედიცინო განათლების გზაზე არსებული გამოწვევების გადალახვის შესახებ.