კენ ვოლკერის საერთაშორისო უნივერსიტეტში წარმატებით განხორციელდა სტუდენტთა ინიციატივით ორგანიზებული გადაუდებელი დახმარების ვორქშოფების პირველი სერია.
ტრენინგების სერია - „გადაარჩინე სიცოცხლე” - ორგანიზებულია კვსუ-ის სტუდენტური კლუბის, Ken Walker Medical Society-ის მიერ, უნივერსიტეტის სიმულაციის ცენტრთან თანამშრომლობით.
ორმოდულიანი ტრენინგის მიზანია სტუდენტებისთვის სიცოცხლის გადამრჩენი ძირითადი კლინიკური უნარებისა და გადაუდებელი დახმარების პრაქტიკული მეთოდების განვითარება - იმ უნარების, რომლებიც კრიტიკულ მომენტებში შეიძლება გადამწყვეტი აღმოჩნდეს ადამიანის სიცოცხლისთვის.
ვორქშოფის პირველი სესია, რომელიც გაიმართა 27 მარტს, მოიცავდა გადაუდებელი დახმარების საბაზისო ინტერვენციებს, მათ შორის:
• კარდიოპულმონური რეანიმაცია (CPR) და სიცოცხლის გადარჩენის ბაზისური ალგორითმი (BLS) - გულის გაჩერების შემთხვევაში მოქმედების ალგორითმს, რომელიც უზრუნველყოფს სწრაფ რეაგირებას და სასიცოცხლო ფუნქციების შენარჩუნებას სპეციალიზებული დახმარების მიღებამდე;
• ჰაიმლიხის მანევრი და სასუნთქი გზების მართვა (ინტუბაცია) - გადაუდებელ სიტუაციებში კრიტიკული მნიშვნელობის უნარებს სასუნთქი გზების ობსტრუქციის აღმოსაფხვრელად და სუნთქვის აღსადგენად.
ტრენინგი განხორციელდა სიმულაციაზე დაფუძნებულ გარემოში, რაც სტუდენტებს აძლევდა შესაძლებლობას, რეალურ კლინიკურ სცენარებთან მაქსიმალურად მიახლოებულ პირობებში განევითარებინათ პრაქტიკული უნარები. აღნიშნული მიდგომა მნიშვნელოვნად ზრდის როგორც პროფესიულ თავდაჯერებულობას, ასევე სწრაფი და ეფექტური გადაწყვეტილებების მიღების უნარს.
აღსანიშნავია კვსუ-ის სიმულაციური ცენტრის მნიშვნელოვანი როლი სტუდენტური ინიციატივის განხორციელებაში. ცენტრმა უზრუნველყო როგორც ინფრასტრუქტურული, ასევე საგანმანათლებლო მხარდაჭერა - შესაბამისი სივრცე, თანამედროვე სიმულაციური აღჭურვილობა და პრაქტიკული სწავლებისთვის აუცილებელი რესურსები. ცენტრის თანამშრომლები ასევე აქტიურად იყვნენ ჩართულნი ვორქშოფის სტრუქტურისა და პრაქტიკული კომპონენტების დაგეგმვაში, რაც მონაწილეებს სთავაზობდა მაღალი ხარისხის, რეალობასთან მაქსიმალურად მიახლოებულ სასწავლო გამოცდილებას.
ვორქშოფის მთავარი გზავნილი ნათელია - გადაუდებელ მედიცინაში ყოველი წამი გადამწყვეტია.
ვორქშოფის მეორე სესია, რომელიც გაიმართება 3 აპრილს, მოიცავს:
• სისხლდენის მართვის ტექნიკებს
• დამწვრობის მართვას
• სპორტული ტრავმების საწყის მართვას, მათ შორის დაჭიმულობებსა და მოტეხილობებს
პროგრამის წარმატებით დასრულების შემდეგ მონაწილეებს გადაეცემათ სერტიფიკატები.
კენ ვოლკერის საერთაშორისო უნივერსიტეტი აქტიურად უჭერს მხარს სტუდენტურ ინიციატივებს და ქმნის გარემოს, სადაც თეორიული ცოდნა ეფექტურად ტრანსფორმირდება პრაქტიკულ გამოცდილებად - მომავალი ექიმების რეალური პროფესიული მზადყოფნის უზრუნველსაყოფად.