კვსუ-ში დედა ენის დღისადმი მიძღვნილი აქტივობა გაიმართა, რომელშიც საერთაშორისო სტუდენტები აქტიურად ჩაერთნენ. ღონისძიება მოიცავდა როგორც შემეცნებით ლექციას, ისე სახალისო გასართობ აქტივობებს.
სტუდენტებს სხვადასხვა გამოსახულების ქართულად დასახელება ევალებოდათ. მონაწილეებმა დავალებას ძალიან კარგად გაართვეს თავი და მაღალი ჩართულობა და ინტერესი გამოავლინეს. სახალისო აქტივობებისა და შეჯიბრის დასრულების შემდეგ სტუდენტებს სიმბოლური პრიზები გადაეცათ.
ქართული ენის სწავლება კვსუ-ს მედიცინის პროგრამის მნიშვნელოვანი ნაწილია, განსაკუთრებით საერთაშორისო სტუდენტებისთვის. ენის ცოდნა მათ შესაძლებლობას აძლევს ეფექტური კომუნიკაცია დაამყარონ პაციენტებთან, კლინიკურ პერსონალთან და სრულფასოვნად შეაგროვონ სამედიცინო ისტორია კლინიკურ ბაზებზე პრაქტიკის განმავლობაში.
საქართველოში დედა ენის დღე ყოველწლიურად 14 აპრილს აღინიშნება და უკავშირდება 1978 წლის ისტორიულ მოვლენებს, როდესაც საზოგადოების ფართო პროტესტის შედეგად ქართულმა ენამ სახელმწიფო ენის სტატუსი შეინარჩუნა. ეს დღე ხაზს უსვამს ქართული ენის, როგორც ეროვნული იდენტობისა და კულტურული მემკვიდრეობის მნიშვნელოვან როლს.
მსგავსი აქტივობები ხელს უწყობს არა მხოლოდ ენის სწავლას, არამედ სტუდენტების ინტეგრაციასა და პრაქტიკული უნარების განვითარებას.