კენ ვოლკერის საერთაშორისო უნივერსიტეტში გვჯერა, რომ სიცოცხლის გადამრჩენი უნარები ყველასთვის ხელმისაწვდომი უნდა იყოს.
კვსუ-ის სიმულაციური ცენტრის ინიციატივით, თბილისის 31-ე საჯარო სკოლის VIII-X კლასის მოსწავლეებმა მონაწილეობა მიიღეს ერთდღიან გადაუდებელი დახმარების ტრენინგში.
მოწვეული ლექტორების - გვანცა ჯაჭვაძისა და ლუკა კუჭავას ხელმძღვანელობით, მონაწილეებმა შეიძინეს როგორც თეორიული ცოდნა, ისე პრაქტიკული უნარები გადაუდებელ სიტუაციებში სწორი რეაგირებისთვის.
ტრენინგის ფარგლებში მოსწავლეებმა შეისწავლეს:
• გულ-ფილტვის რეანიმაცია (CPR);
• სისხლდენის ეფექტური კონტროლი;
• ჰაიმლიხის მანევრი (დახრჩობის შემთხვევაში დახმარების ტექნიკა).
განსაკუთრებული ყურადღება დაეთმო CPR-ს, როგორც კრიტიკულად მნიშვნელოვან უნარს. პრაქტიკული სესიები ჩატარდა ინტერაქციულ ფორმატში, სპეციალური სასწავლო მანეკენების გამოყენებით, რაც მონაწილეებს დაეხმარა ცოდნის გაღრმავებასა და რეალურ სიტუაციებთან დაახლოებაში.
უნივერსიტეტის ტურის ფარგლებში მოსწავლეებმა დაათვალიერეს სიმულაციური ცენტრი, გაეცნენ თანამედროვე სამედიცინო ტექნოლოგიებს და პრაქტიკულ სასწავლო გარემოს. განსაკუთრებული ინტერესი გამოიწვია თანამედროვე ანატომიურმა მულაჟმა, რომელიც ამ ეტაპზე უნიკალურია საქართველოში და ხელმისაწვდომია მხოლოდ კვსუ-ში.
ტრენინგის მიზანი იყო მოსწავლეებში პასუხისმგებლობის, თავდაჯერებულობისა და კრიტიკულ სიტუაციებში ეფექტური რეაგირების უნარის განვითარება. აქტივობას სკოლის მხრიდან კოორდინაციას უწევდა ბიოლოგიის მასწავლებელი ნათია გაფრინდაშვილი.