კენ ვოლკერის საერთაშორისო უნივერსიტეტმა „მწვანე სკოლის“ მე-6 კლასის მოსწავლეებს უმასპინძლა. სტუმრობის ფარგლებში ბავშვები უნივერსიტეტის სასწავლო გარემოსა და სამედიცინო განათლების პრაქტიკულ მიმართულებებს გაეცნენ.
დღე სიმულაციური ცენტრის დათვალიერებით დაიწყო, სადაც მოსწავლეებმა თანამედროვე სამედიცინო მანეკენები და სიმულაციებზე დაფუძნებული სწავლების პროცესი ახლოდან ნახეს.
ვიზიტის ერთ-ერთი ყველაზე შთამბეჭდავი ნაწილი ანატომიის ლაბორატორიაში სტუმრობა აღმოჩნდა, სადაც მოსწავლეებმა ადამიანის ანატომიური მანეკენი დაათვალიერეს და ადამიანის სხეულის აგებულების შესახებ მეტი ინფორმაცია მიიღეს.
პროგრამა გაგრძელდა ინტერაქციული აქტივობით - „რომელი ორგანო ვარ?“, რომლის მეშვეობითაც მოსწავლეებმა ადამიანის ორგანიზმის შესახებ ცოდნა სახალისო და შემეცნებითი ფორმატით გაიღრმავეს.
განსაკუთრებული ინტერესი გამოიწვია ლაბორატორიულმა აქტივობამაც - მოსწავლეებმა მიკროსკოპებში ჩაიხედეს, დაათვალიერეს პრეპარატები და მიკროსამყაროს აღმოჩენის შესაძლებლობა თავად გამოცადეს.
ვიზიტის ერთ-ერთი მთავარი ნაწილი CPR-ის პრაქტიკული სესია იყო, სადაც ბავშვებმა გულ-ფილტვის რეანიმაციის ძირითადი პრინციპები შეისწავლეს და შესაბამისი მანიპულაციების შესრულებაც თავად სცადეს.
ვიზიტის დასასრულს „მწვანე სკოლის“ მოსწავლეებმა უნივერსიტეტს განსაკუთრებული სამახსოვრო საჩუქარი გადასცეს წარწერით -
“Two places, One connection, A friendship begins” - რაც ამ დღის ყველაზე თბილ სიმბოლოდ და ახალი ურთიერთობის დასაწყისად იქცა.
კენ ვოლკერის საერთაშორისო უნივერსიტეტი მადლობას უხდის „მწვანე სკოლას“ სტუმრობისთვის და მოსწავლეებს მომავალ წარმატებებს უსურვებს.