კენ ვოლკერის საერთაშორისო უნივერსიტეტის დეპარტამენტის – პრეკლინიკური მიმართულება: კვლევის მეთოდოლოგია და მართვა – პროფესორმა, ნონა ჯანიკაშვილმა, მონაწილეობა მიიღო ბრიუსელში გამართულ საერთაშორისო ფორუმში „From Ideas to Impact: Emerging Health Technologies in Action“.
ღონისძიება ევროკავშირის კიბოს მისიისა და ინოვაციური ჯანდაცვის ინიციატივის პრიორიტეტების ფარგლებში გაიმართა და ევროპის წამყვანი უნივერსიტეტების, კვლევითი ცენტრებისა და ჯანდაცვის სფეროს ექსპერტები გააერთიანა.
ფორუმის ფარგლებში პროფესორმა ნონა ჯანიკაშვილმა წარადგინა ხედვა, რომელიც ციფრული ჯანმრთელობისა და ზუსტი მედიცინის მიმართულებით ინტეროპერაბელური ინფრასტრუქტურის შექმნასა და ინოვაციების ინკუბაციის ხელშეწყობას ეხებოდა.
მისი პრეზენტაცია ღონისძიების ერთ-ერთ ყველაზე წარმატებულ გამოსვლად დასახელდა, რაც კიდევ ერთხელ ადასტურებს კენ ვოლკერის საერთაშორისო უნივერსიტეტის აკადემიური საზოგადოების მზარდ საერთაშორისო აღიარებასა და ჩართულობას ჯანდაცვის ინოვაციების სფეროში.
ღონისძიების ფარგლებში გაიმართა სამუშაო შეხვედრები ევროპული აკადემიური და კვლევითი ინსტიტუტების წარმომადგენლებთან. განხილვის მთავარი თემები იყო მომავალი პარტნიორობები, ერთობლივი კვლევითი ინიციატივები და საერთაშორისო პროექტებში ჩართულობის შესაძლებლობები, მათ შორის, Horizon Europe-ის პროგრამის ფარგლებში.
„ბრიუსელში გამართული ფორუმი იყო მნიშვნელოვანი შესაძლებლობა საერთაშორისო პარტნიორებთან გამოცდილებისა და იდეების გასაზიარებლად. მოხარული ვარ, რომ კენ ვოლკერის საერთაშორისო უნივერსიტეტმა შეძლო საკუთარი ხედვის წარდგენა ციფრული ჯანმრთელობისა და ზუსტი მედიცინის მიმართულებით. მსგავსი ღონისძიებები ახალ შესაძლებლობებს ქმნის საერთაშორისო თანამშრომლობისა და ინოვაციური პროექტების განვითარებისთვის“, - აღნიშნავს პროფესორი ნონა ჯანიკაშვილი.
კენ ვოლკერის საერთაშორისო უნივერსიტეტი აქტიურად განაგრძობს საერთაშორისო აკადემიური პარტნიორობების გაფართოებას და განათლების, კვლევისა და ჯანდაცვის მიმართულებებით ინოვაციების გლობალური განვითარების ხელშეწყობას. უნივერსიტეტის წარმომადგენლების მონაწილეობა საერთაშორისო ფორუმებსა და პროფესიულ ქსელებში კიდევ უფრო აძლიერებს კვსუ-ის პოზიციებს საერთაშორისო აკადემიურ და სამეცნიერო სივრცეში.