კენ ვოლკერის საერთაშორისო უნივერსიტეტში გაიმართა სტუდენტური სამეცნიერო კონფერენცია, რომელმაც KWIU-ისა და სხვადასხვა უმაღლესი სასწავლებლების სტუდენტები, ახალგაზრდა მკვლევარები და აკადემიური სფეროს წარმომადგენლები გააერთიანა.
კონფერენცია KWIU-ის სტუდენტური კლუბის - სტუდენტური სამეცნიერო ასოციაციის ორგანიზებით ჩატარდა და მონაწილეებს შესაძლებლობა მისცა, ფართო აუდიტორიისთვის წარედგინათ საკუთარი კვლევები, გაეზიარებინათ გამოცდილება და ჩართულიყვნენ სამეცნიერო დისკუსიებში.
ღონისძიებას სპეციალური სტუმრის სტატუსით ესწრებოდა ემორის უნივერსიტეტის მედიცინის სკოლის გადაუდებელი მედიცინის ექიმი და სამედიცინო ტოქსიკოლოგიის პროგრამის მკვლევარი, თორი ერჰარდტი. იგი გაეცნო სტუდენტურ პრეზენტაციებს, პოსტერულ ნაშრომებს და მონაწილეებთან ერთად განიხილა მათი კვლევითი პროექტები.
კონფერენციის სამეცნიერო პროგრამა მოიცავდა როგორც ზეპირ, ისე პოსტერულ პრეზენტაციებს თანამედროვე მედიცინისა და ბიოსამედიცინო მეცნიერებების აქტუალურ საკითხებზე. წარმოდგენილი თემები შეეხებოდა ნეიროდეგენერაციულ დაავადებებს, გენურ თერაპიას, რეგენერაციულ მედიცინას, ბაქტერიოფაგურ კვლევებს, ონკოლოგიას, ქალთა ჯანმრთელობას, ხელოვნური ინტელექტის გამოყენებას მედიცინაში და საზოგადოებრივი ჯანმრთელობის თანამედროვე გამოწვევებს.
KWIU-ის სტუდენტებმა წარადგინეს კვლევები კლინიკური მედიცინის, სამედიცინო განათლების, ჯანდაცვის ინოვაციებისა და თანამედროვე ტექნოლოგიების მიმართულებით. მათი ნამუშევრები კიდევ ერთხელ წარმოაჩენდა სტუდენტებში სამეცნიერო საქმიანობისადმი მზარდ ინტერესს, კვლევითი უნარების განვითარებასა და აკადემიურ აქტიურობას.
კონფერენციის ფარგლებში მონაწილეებმა არა მხოლოდ საკუთარი კვლევები წარადგინეს, არამედ ერთმანეთს გაუზიარეს გამოცდილება, იდეები და ხედვები სამედიცინო მეცნიერების თანამედროვე გამოწვევებისა და განვითარების პერსპექტივების შესახებ. ღონისძიება მნიშვნელოვანი პლატფორმა გახდა სამეცნიერო თანამშრომლობის, ცოდნის გაზიარებისა და პროფესიული კავშირების ჩამოყალიბებისთვის.
კონფერენციის სპეციალურმა სტუმარმა, ექიმმა თორი ერჰარდტმა, სტუდენტების აკადემიური მომზადება და პროფესიონალიზმი განსაკუთრებით გამოყო.
„კონფერენციამ ჩემზე ძალიან დადებითი შთაბეჭდილება მოახდინა. სტუდენტების მიერ წარმოდგენილი როგორც სისტემური მიმოხილვები, ისე ორიგინალური კვლევები საინტერესო იყო. აშკარად ჩანდა, რომ მონაწილეები პასუხისმგებლობით მოეკიდნენ საკუთარ ნამუშევრებს და პრეზენტაციებისთვის საფუძვლიანად მოემზადნენ. განსაკუთრებით შთამბეჭდავი იყო მათი თავდაჯერებულობა და პროფესიონალიზმი. ჩემთვის დიდი პატივია მათთან შეხვედრა და გამოცდილების გაზიარება, თუმცა დარწმუნებით შემიძლია ვთქვა, რომ ისინი უკვე წარმატებული პროფესიული გზის დასაწყისში არიან“, - აღნიშნა თორი ერჰარდტმა.
სტუდენტური სამეცნიერო ასოციაციის წარმომადგენელმა ზაჰრა სირაჯმა კონფერენციის ორგანიზების გამოცდილებაზე ისაუბრა:
„ეს იყო პირველი კონფერენცია, რომელიც ჩვენი სტუდენტური სამეცნიერო ასოციაციის ორგანიზებით ჩატარდა და შედეგით ნამდვილად ვამაყობთ. ღონისძიების მომზადების პროცესში მრავალმხრივი და მნიშვნელოვანი გამოცდილება შევიძინეთ - აბსტრაქტების შეფასებიდან დაწყებული, მონაწილეებთან კომუნიკაციითა და საორგანიზაციო საკითხების კოორდინაციით დასრულებული. ყველაზე სასიამოვნო კი იმის დანახვა იყო, თუ როგორ იქცა ჩვენი იდეები და გაწეული შრომა წარმატებულ შედეგად“.
კონფერენციის ერთ-ერთმა ორგანიზატორმა, KWIU-ის სტუდენტმა ლოლიტა ხალვაშმა, ღონისძიების მასშტაბსა და მონაწილეთა მრავალფეროვნებაზე გაამახვილა ყურადღება:
„კონფერენციამ 100-ზე მეტ მონაწილეს მოუყარა თავი. განსაკუთრებით სასიამოვნო იყო სხვადასხვა უნივერსიტეტის სტუდენტების კვსუ-ში ხილვა, რომლებიც ერთმანეთს საკუთარ კვლევებს უზიარებდნენ, აზრებს ცვლიდნენ და აქტიურად ერთვებოდნენ სამეცნიერო დისკუსიებში. გვჯერა, რომ ეს კონფერენცია ტრადიციად ჩამოყალიბდება და მომავალ წლებში კიდევ უფრო ფართო მასშტაბებს შეიძენს“.
ფადი თარექ მანსურმა კონფერენციის საორგანიზაციო პროცესსა და მიღებულ გამოცდილებაზე ისაუბრა:
„ჩვენთვის დიდი პასუხისმგებლობა და ამავე დროს განსაკუთრებული გამოცდილება იყო უნივერსიტეტის პირველი სტუდენტური სამეცნიერო კონფერენციის ორგანიზებაში მონაწილეობა. პროცესმა მრავალი გამოწვევის წინაშე დაგვაყენა, თუმცა თითოეულმა სირთულემ ახალი გამოცდილება შეგვძინა. განსაკუთრებით საინტერესო იყო მონაწილეების კვლევებისა და აკადემიური ინტერესების გაცნობა. ჩემთვის მნიშვნელოვანი გამოცდილება იყო საკუთარი ლიტერატურული მიმოხილვის წარდგენაც. დარწმუნებული ვარ, ეს მხოლოდ დასაწყისია და მომავალში კიდევ არაერთ საინტერესო კონფერენციას ვიხილავთ“.
მარიამ თარექ მანსურმა კი კონფერენციის აკადემიური მნიშვნელობა და მონაწილეთა ჩართულობა გამოყო:
„კონფერენცია სამედიცინო ინოვაციებს მიეძღვნა და ძალიან სასიამოვნო იყო თბილისის სხვადასხვა უნივერსიტეტის სტუდენტების მასპინძლობა. მონაწილეებმა არა მხოლოდ საკუთარი კვლევები წარადგინეს, არამედ ერთმანეთისთვის გამოცდილებისა და იდეების გაზიარების შესაძლებლობაც შექმნეს. განსაკუთრებით მაღალი დონით გამოირჩეოდა როგორც ზეპირი, ისე პოსტერული პრეზენტაციები. ვამაყობთ იმ შედეგით, რომელსაც პირველივე ღონისძიებაზე მივაღწიეთ და გვჯერა, რომ მომავალში კიდევ უფრო მასშტაბურ და წარმატებულ კონფერენციებს ჩავატარებთ“.
კონფერენციის დასასრულს მონაწილეები სერტიფიკატებით დაჯილდოვდნენ. ღონისძიებამ კიდევ ერთხელ წარმოაჩინა სტუდენტების მაღალი აკადემიური მოტივაცია, კვლევითი პოტენციალი და KWIU-ის ერთგულება კვლევაზე დაფუძნებული განათლების, საერთაშორისო თანამშრომლობისა და სამეცნიერო ინიციატივების მხარდაჭერის მიმართ.
სტუდენტური სამეცნიერო კონფერენცია KWIU-ში მნიშვნელოვანი ნაბიჯი იყო ახალგაზრდა მკვლევართა გაძლიერებისა და სამეცნიერო კულტურის განვითარების მიმართულებით და საფუძველს უყრის ტრადიციას, რომელიც მომავალ წლებში კიდევ უფრო მასშტაბური და წარმომადგენლობითი გახდება.