კენ ვოლკერის საერთაშორისო უნივერსიტეტში გრძელდება ემორის უნივერსიტეტის მედიცინის სკოლის გადაუდებელი მედიცინის ექიმისა და სამედიცინო ტოქსიკოლოგიის მკვლევარის, დოქტორ თორი ერჰარდტის, სამუშაო ვიზიტის ფარგლებში დაგეგმილი ლექციებისა და პრაქტიკული სესიების ციკლი.
მორიგი სასწავლო შეხვედრა დაეთმო ადიქციურ მედიცინას, მოწამლული პაციენტების გადაუდებელ სტაბილიზაციასა და დამოკიდებულების გრძელვადიან მართვას. სესიის ფარგლებში სტუდენტები გაეცნენ თანამედროვე მიდგომებს ნივთიერებებზე დამოკიდებულების მქონე პაციენტების მართვისა და გადაუდებელ სიტუაციებში კლინიკური გადაწყვეტილებების მიღების მიმართულებით.
ლექციის შემდეგ გაიმართა პრაქტიკული ნაწილი, რომლის დროსაც მონაწილეებმა სიმულაციურ გარემოში იმუშავეს სხვადასხვა კლინიკურ შემთხვევაზე. სტუდენტებმა პრაქტიკაში გამოსცადეს პაციენტზე ზრუნვის მნიშვნელოვანი ასპექტები, განივითარეს კლინიკური აზროვნება და მიიღეს პროფესიული უკუკავშირი როგორც ლექტორის, ისე თანაკურსელებისგან.
დოქტორმა თორი ერჰარდტმა განსაკუთრებული ყურადღება გაამახვილა პრაქტიკული სწავლების მნიშვნელობაზე და იმაზე, თუ რამდენად მნიშვნელოვანია სამედიცინო განათლებაში თეორიული ცოდნის რეალურ ან სიმულირებულ კლინიკურ გარემოში გამოყენება. მისი შეფასებით, მსგავსი აქტივობები სტუდენტებს ეხმარება არა მხოლოდ ცოდნის გაღრმავებაში, არამედ პროფესიული თავდაჯერებულობის, კომუნიკაციისა და კლინიკური გადაწყვეტილებების მიღების უნარების განვითარებაშიც.
თორი ერჰარდტის ვიზიტი KWIU-ში მოიცავს ლექციებს, მცირე ჯგუფურ სესიებს, პრაქტიკულ აქტივობებსა და მენტორულ შეხვედრებს, რომლებიც სტუდენტებს შესაძლებლობას აძლევს, გაეცნონ ამერიკული სამედიცინო განათლებისა და კლინიკური პრაქტიკის თანამედროვე მიდგომებს.
მსგავსი საერთაშორისო თანამშრომლობა და პრაქტიკაზე დაფუძნებული სწავლების ფორმატები კენ ვოლკერის საერთაშორისო უნივერსიტეტის სტუდენტებს უნიკალურ შესაძლებლობას აძლევს, განივითარონ პროფესიული უნარები და უკეთ მოემზადონ მომავალი სამედიცინო საქმიანობისთვის.