კენ ვოლკერის საერთაშორისო უნივერსიტეტსა და ემორის უნივერსიტეტს შორის არსებული მჭიდრო აკადემიური თანამშრომლობა გრძელდება და მოიცავს როგორც ინსტიტუციურ პარტნიორობას, ასევე აკადემიური პერსონალის პროფესიული განვითარების, საერთაშორისო გამოცდილების გაზიარებისა და თანამედროვე საგანმანათლებლო მიდგომების დანერგვის შესაძლებლობებს.
თანამშრომლობის ფარგლებში, კენ ვოლკერის საერთაშორისო უნივერსიტეტის ასისტენტ-პროფესორი ია აღდგომელაშვილი ემორის უნივერსიტეტის მედიცინის სკოლასა და გრეიდის მემორიალურ ჰოსპიტალში იმყოფებოდა, სადაც გაეცნო გადაუდებელი მედიცინისა და ინტენსიური თერაპიის დეპარტამენტების მუშაობას, კლინიკურ პრაქტიკასა და სწავლების თანამედროვე მიდგომებს.
პროგრამას ხელმძღვანელობდა ემორის უნივერსიტეტის გადაუდებელი მედიცინის პროფესორი და სამედიცინო ტოქსიკოლოგი, საერთაშორისო სამედიცინო ტოქსიკოლოგიის პროგრამის დირექტორი და ჯორჯიის ინტოქსიკაციის კონტროლის ცენტრის სამედიცინო დირექტორის მოადგილე, ექიმი ზიად კაზი.
ვიზიტის ფარგლებში ია აღდგომელაშვილი დაესწრო მასტერკლასებსა და პროფესიულ კონფერენციებს, მონაწილეობდა სამუშაო შეხვედრებში როგორც აკადემიური, ისე კლინიკური მიმართულებით. კენ ვოლკერის საერთაშორისო უნივერსიტეტისა და ემორის უნივერსიტეტის თანამშრომლობის ფარგლებში განხორციელებული მსგავსი აქტივობები ხელს უწყობს აკადემიური პერსონალის პროფესიულ განვითარებას, საერთაშორისო საუკეთესო პრაქტიკის გაზიარებასა და მიღებული გამოცდილების უნივერსიტეტის სასწავლო და კლინიკურ საგანმანათლებლო პროცესებში ინტეგრირებას.