კენ ვოლკერის საერთაშორისო უნივერსიტეტის რექტორი, პროფესორი ეკა ეკალაძე და ხარისხის უზრუნველყოფის სამსახურის ხელმძღვანელი ნინო შიუკაშვილი KWIU-ს სახელით მონაწილეობდნენ AMEE 2026-ის ყოველწლიურ კონფერენციაში, რომელიც 22-26 აგვისტოს ავსტრიის დედაქალაქ ვენაში გაიმართა.
AMEE 2026-მა მსოფლიოს სხვადასხვა ქვეყნიდან სამედიცინო განათლების სპეციალისტები, მკვლევარები და აკადემიური სფეროს წარმომადგენლები გააერთიანა და სამედიცინო განათლებაში არსებული გამოცდილების, კვლევების, თანამედროვე მიდგომებისა და საუკეთესო პრაქტიკის გაზიარების მნიშვნელოვანი საერთაშორისო სივრცე შექმნა.
კონფერენციის პროგრამა მოიცავდა პლენარულ სესიებს, სიმპოზიუმებს, ინტერაქტიულ ვორქშოფებსა და კვლევით პრეზენტაციებს. განხილული იყო სამედიცინო განათლების მომავალი და მისი როლი თანამედროვე ჯანდაცვის განვითარებაში. განსაკუთრებული ყურადღება დაეთმო ხელოვნური ინტელექტისა და ციფრული ტექნოლოგიების გამოყენებას განათლებაში, სწავლებისა და შეფასების ინოვაციურ მეთოდებს, ინტერპროფესიულ განათლებას, ხარისხის გაუმჯობესებასა და განათლების კვლევის თანამედროვე მიმართულებებს.
AMEE 2026-ში მონაწილეობამ KWIU-ის წარმომადგენლებს შესაძლებლობა მისცა, გაცნობოდნენ სამედიცინო განათლების სფეროში მიმდინარე საერთაშორისო პროცესებს, გაეზიარებინათ პროფესიული გამოცდილება, დაემყარებინათ ახალი კავშირები და განეხილათ სამომავლო თანამშრომლობის შესაძლებლობები.
კონფერენციაზე მიღებული ცოდნა და გამოცდილება ხელს შეუწყობს KWIU-ში სამედიცინო განათლების ხარისხის შემდგომ გაუმჯობესებას, აკადემიური პერსონალის პროფესიულ განვითარებასა და უნივერსიტეტის საგანმანათლებლო პროგრამებში ინოვაციური მიდგომების დანერგვას.
KWIU-ის წარმომადგენლები ვენიდან ახალი იდეებით, მნიშვნელოვანი პროფესიული კავშირებითა და საერთაშორისო თანამშრომლობის საინტერესო პერსპექტივებით დაბრუნდნენ.