კენ ვოლკერის საერთაშორისო უნივერსიტეტში გრძელდება ემორის უნივერსიტეტის მედიცინის სკოლის გადაუდებელი მედიცინის ექიმისა და სამედიცინო ტოქსიკოლოგიის მკვლევარის, თორი ერჰარდტის ვიზიტი.
ვიზიტის ფარგლებში ექიმი თორი ერჰარდტი KWIU-ის სტუდენტებთან ინდივიდუალურ მენტორულ შეხვედრებსა და იმიტირებულ ინტერვიუებს ატარებს, რაც მათ ამერიკის შეერთებულ შტატებში რეზიდენტურის პროგრამებზე განაცხადის პროცესისთვის მომზადებაში ეხმარება.
შეხვედრების განმავლობაში სტუდენტები იღებენ პრაქტიკულ რეკომენდაციებს ინტერვიუს ტექნიკების, პროფესიული კომუნიკაციის, პერსონალური განცხადების მომზადების, სამეცნიერო კვლევებში ჩართულობის, კლინიკური გამოცდილების დაგროვებისა და სხვა მნიშვნელოვანი ფაქტორების შესახებ, რომლებიც ამერიკულ რეზიდენტურაში წარმატებული განაცხადისთვის აუცილებელია.
იმიტირებული ინტერვიუების ფორმატი მონაწილეებს რეალურ გარემოსთან მაქსიმალურად მიახლოებულ გამოცდილებას სთავაზობს. თითოეული შეხვედრის შემდეგ სტუდენტები იღებენ დეტალურ და პერსონალიზებულ უკუკავშირს, რაც მათ საკუთარი ძლიერი მხარეების უკეთ წარმოჩენასა და გასაუმჯობესებელი მიმართულებების იდენტიფიცირებაში ეხმარება.
მენტორული სესიების ფარგლებში სტუდენტებს ასევე შესაძლებლობა აქვთ, ინდივიდუალურად განიხილონ საკუთარი აკადემიური და პროფესიული მიზნები, მიიღონ კარიერული განვითარების რეკომენდაციები და გაეცნონ საერთაშორისო სამედიცინო განათლებისა და კარიერული გზების დაგეგმვის პრაქტიკულ ასპექტებს.
აღნიშნული ინიციატივა KWIU-ის სტუდენტებს უნიკალურ შესაძლებლობას აძლევს, უშუალოდ ამერიკელი ექიმისა და მკვლევრისგან მიიღონ გამოცდილებაზე დაფუძნებული რჩევები და უკეთ მოემზადონ საერთაშორისო საგანმანათლებლო და პროფესიული შესაძლებლობებისთვის.