კენ ვოლკერის საერთაშორისო უნივერსიტეტში მედიცინის ფაკულტეტის სტუდენტებისთვის გაიმართა შეხვედრა სარეაბილიტაციო ცენტრ „ნებას“ დამფუძნებელთან და თერაპიული პროცესის ხელმძღვანელთან, თამაზ ტუღუშთან. ღონისძიება ჩატარდა კვსუ-ში მიმდინარე ადიქციური მედიცინის საგანმანათლებლო ციკლის ფარგლებში, რომელსაც ხელმძღვანელობდა თორი ერდჰარტი, ემორის უნივერსიტეტის მედიცინის სკოლის გადაუდებელი მედიცინის ექიმი და სამედიცინო ტოქსიკოლოგიის ფელოუ.
შეხვედრის მთავარი თემა იყო ტრავმათერაპია, დამოკიდებულების მედიცინა და გამოჯანმრთელების პროცესი. თამაზ ტუღუში სტუდენტებს ესაუბრა განვითარების, შოკური და ბავშვობის ტრავმების ხანგრძლივი გავლენისა და იმ მჭიდრო კავშირის შესახებ, რომელიც ბიოლოგიურ და ფსიქოლოგიურ პროცესებს შორის არსებობს. განსაკუთრებული ყურადღება დაეთმო ტრავმის გავლენას ადამიანის ფსიქიკასა და ქცევაზე, ასევე ნივთიერებებისადმი დამოკიდებულების განვითარებისა და აღდგენის თანამედროვე მიდგომებს.
შეხვედრის განსაკუთრებული ნაწილი იყო თამაზ ტუღუშის პირადი ისტორია - გზა ნივთიერებაზე დამოკიდებულებიდან გამოჯანმრთელებამდე. სტუდენტებმა პაციენტის პერსპექტივიდან მოისმინეს რეალური გამოცდილება, რაც მათ საშუალებას აძლევდა, თეორიული ცოდნა რეალურ კლინიკურ კონტექსტთან დაეკავშირებინათ.
აღნიშნული შეხვედრით დასრულდა ადიქციური მედიცინის თემაზე ჩატარებული საგანმანათლებლო სესიების ციკლი, რომლის ფარგლებშიც სტუდენტებმა უკვე გაიარეს ლექციები და სიმულირებული კლინიკური შემთხვევები. საბოლოო შეხვედრამ მათ შესაძლებლობა მისცა, დაავადება არა მხოლოდ კლინიკური, არამედ ადამიანური და სოციალური კუთხითაც გაეაზრებინათ.
კენ ვოლკერის საერთაშორისო უნივერსიტეტი განაგრძობს საერთაშორისო პარტნიორებთან თანამშრომლობით ისეთი საგანმანათლებლო გამოცდილების შექმნას, რომელიც მომავალ ექიმებს თანამედროვე ცოდნასთან ერთად, პაციენტზე ორიენტირებულ და ემპათიურ პროფესიულ ხედვას უყალიბებს.