კენ ვოლკერის საერთაშორისო უნივერსიტეტის სტუდენტებმა ცოტა ხნის წინ თავიანთი გონებრივი შესაძლებლობები და გუნდური მუშაობის უნარი ინტელექტუალურ შეჯიბრში - "Brain Storm" წარმოაჩინეს.
სახალისო თამაში პოპულარული ფორმატის, „რა? სად? როდის?“ პრინციპებზეა დაფუძნებული, რაც სტუდენტებისგან სწრაფ აზროვნებას, ეფექტურ მუშაობას და მრავალმხრივი ცოდნის გამოყენებას მოითხოვს.
დარბაზში დაძაბული და ამაღელვებელი ატმოსფერო სუფევდა, რადგან გუნდები კითხვებზე პასუხის გასაცემად რთმანეთს დროში ეჯიბრებოდნენ. საინტერესო და დაძაბული კონკურსის შემდეგ, ღონისძიება საუკეთესო გუნდებისა და ინდივიდუალური მონაწილეებისთვის მედლებისა და სერტიფიკატების გადაცემის ცერემონიით დასრულდა.
"Brain Storm"-ის ინოვაციური იდეის ავტორია პროფესორი ლაშა ქურდაშვილი, კვსუ-ის ლექტორი. მისი იდეა კიდევ ერთხელ უსვამს ხაზს უნივერსიტეტის სწრაფვას, ხელი შეუწყოს სტუდენტებში ცოდნისმოყვარეობის, კრიტიკული აზროვნებისა და აკადემიური განვითარების წახალისებას.