კენ ვოლკერის საერთაშორისო უნივერსიტეტმა მნიშვნელოვან საერთაშორისო ვიზიტს უმასპინძლა. კვსუ-ს ეწვივნენ Culmen International-ის წარმომადგენლები - ბატონ დენის ფეიქსი, გლობალური ჯანმრთელობის დირექტორი და ქალბატონი ზარი გოლდმანი, საერთაშორისო ჰუმანიტარული განვითარების დეპარტამენტის დირექტორი.
Culmen International ერთ-ერთი წამყვანი გლობალური ორგანიზაციაა, რომელიც 140-ზე მეტ ქვეყანაში ახორციელებს ტექნიკურ, მენეჯმენტთან დაკავშირებულ, ჰუმანიტარულ და ლოგისტიკურ პროექტებს.
სტუმრებს შეხვდნენ ემორის უნივერსიტეტის მედიცინის სკოლის საგანმანათლებლო პროგრამების დირექტორი, პროფესორი არჩილ უნდილაშვილი და კენ ვოლკერის საერთაშორისო უნივერსიტეტის რექტორი, პროფესორი ეკა ეკალაძე. შეხვედრა მნიშვნელოვანი შესაძლებლობა იყო Culmen International-ისთვის საერთაშორისო თანამშრომლობის გაღრმავებისა და საქართველოს აკადემიური სივრცის უკეთ გაცნობის თვალსაზრისით.
შეხვედრაზე განიხილეს მომავალი თანამშრომლობის პერსპექტივები განათლებისა და კვლევის მიმართულებით, რაც საფუძველს უქმნის ორ ორგანიზაციას შორის ღრმა და ეფექტურ პარტნიორობას.
ვიზიტის ფარგლებში დელეგაცია ასევე ეწვია კენ ვოლკერის სახელობის სამედიცინო რეაბილიტაციის საუნივერსიტეტო კლინიკას, სადაც დეტალურად გაეცნო კლინიკის მისიას, სერვისებსა და მის მნიშვნელოვან როლს როგორც საზოგადოებრივი ჯანმრთელობის, ისე სამედიცინო განათლების პრაქტიკული კომპონენტის განვითარებაში.