კენ ვოლკერის საერთაშორისო უნივერსიტეტი მასპინძლობს ექიმ დუგლას ანდერს, ემორის უნივერსიტეტის გადაუდებელი მედიცინის დეპარტამენტის პროფესორს და სამედიცინო განათლების ასისტენტ დეკანს. ვიზიტის ფარგლებში, პროფესორმა ანდერმა სტუდენტებს საინტერესო ლექცია წარუდგინა თემაზე - „ერთი ჩვეულებრივი დღე გადაუდებელი მედიცინის ექიმის ცხოვრებიდან“.
ლექციის დროს პროფესორი ყურადღებით აღწერდა გადაუდებელი მედიცინის დეპარტამენტში მიმდინარე სისწრაფითა და სტრესითა სავსე პროცესებს. საკუთარი გამოცდილებისა და რეალური შემთხვევების გაზიარების გზით პროფესორმა ანდერმა სტუდენტებს აუხსნა, რამდენად მნიშვნელოვანია გუნდური მუშაობა, გადაწყვეტილებების უმოკლეს დროში მიღება და პაციენტების მიმართ თანაგრძნობა კრიტიკულ სიტუაციებში.
ამერიკელი პროფესორის საჯარო ლექციამ წარმოაჩინა გადაუდებელი მედიცინის სფეროში მუშაობის სირთულეები და ის ძალა და შთაგონება, რომელიც სიცოცხლის გადარჩენის ყოველდღიური საქმიანობიდან გამომდინარეობს. ექიმ დუგლას ანდერის მიერ გაზიარებულმა ცოდნამ სტუდენტებში დიდი ენთუზიაზმი და ინტერესი გააღვივა, - ლექციის დასრულების შემდეგ ისინი აქტიურად ჩაერთვნენ კითხვა-პასუხის რეჟიმში, სადაც განხილული იყო ისეთი თემები, როგორიცაა სამედიცინო განათლება, პაციენტზე ზრუნვის სტრატეგიები და კარიერული განვითარების შესაძლებლობები შეერთებულ შტატებში.