კენ ვოლკერის საერთაშორისო უნივერსიტეტში დიაბეტის მსოფლიო დღე აღინიშნა მრავალფეროვანი ინტერაქტიული პროგრამითა და პრაქტიკული ვორქშოპებით. ღონისძიების მიზანი იყო სტუდენტებში ცნობიერების ამაღლება და ჯანსაღი ცხოვრების წესის პოპულარიზაცია. აქტივობები ორგანიზებული იყო სტუდენტური კლუბის - „კვისუ-ის სამედიცინო საზოგადოების“ მიერ.
სტუდენტები ჩაერთნენ სხვადასხვა თემატურ და პრაქტიკულ სესიებში:
- „შაქრის სადგურზე“ მონაწილეებმა გააანალიზეს ტკბილეულისა და პროდუქტებში შემავალი შაქრის რაოდენობა.
- საინფორმაციო სტენდთან - „იცოდე შენი ფაქტები“ — მიიღეს მნიშვნელოვანი რჩევები დიაბეტის პრევენციის შესახებ;
- გამოკითხვის სადგურში შეამოწმეს საკუთარი ცოდნა, გამარჯვებულები კი დაჯილდოვდნენ თემატური წიგნის სანიშნეებით.
კვების კუთხეში - „ააწყვე შენი თეფში“ - მონაწილეებმა პრაქტიკულად შექნეს ბალანსირებული კვების მოდელი, ხოლო პირობის კედელზე დატოვეს პირადი დაპირებები ჯანსაღი ცხოვრების წესის შესახებ.
კენ ვოლკერის საერთაშორისო უნივერსიტეტის ფაკულტეტის წევრებმა წარადგინეს საინფორმაციო პრეზენტაციები დიაბეტის შესახებ და ისაუბრეს იმ ადამიანთა წარმატებულ გამოცდილებაზე, რომლებიც ქრონიკული დაავადების მიუხედავად აქტიურ და სრულფასოვან ცხოვრებას ეწევიან.
სტუდენტები ასევე ჩაერთნენ გლუკოზისა და არტერიული წნევის გაზომვის პრაქტიკულ ვორქშოპში: შესრულდა გლუკოზის დონის დემონსტრაციული ტესტი, რის შემდეგაც მონაწილეები წყვილებად გადანაწილდნენ და პრაქტიკულად ისწავლეს არტერიული წნევის გაზომვის ტექნიკა.
ღონისძიებამ გააერთიანა ცოდნა, პრაქტიკული გამოცდილება და სტუდენტური ინიციატივა, რითაც ხელი შეუწყო ჯანმრთელი ცხოვრების წესის პოპულარიზაციასა და ჯანსაღი მომავალი თაობის ჩამოყალიბებას.