PPS-კურსი კენ ვოლკერის საერთაშორისო უნივერსიტეტში სამედიცინო განათლების ერთ-ერთი უმნიშვნელოვანესი საყრდენია. კურსს ხელმძღვანელობს გვანცა ვარდოსანიძე, რომელიც სტუდენტებს პროფესიული და პიროვნული უნარების განვითარებაში ეხმარება, მათ შორის ეფექტურ კომუნიკაციაში, ეთიკური გადაწყვეტილებების მიღებაში, პაციენტზე ორიენტირებულ მიდგომასა და ექიმის სოციალური როლის სიღრმისეულ გააზრებაში.
PPS-კურსის განსაკუთრებულ ელემენტს წარმოადგენს პროფესიონალი მსახიობის მონაწილეობა, რომელიც პაციენტის როლს ასრულებს და წინასწარ შემუშავებულ კლინიკურ სცენარს მიჰყვება. ეს ინოვაციური მიდგომა სტუდენტებს საშუალებას აძლევს გამოიყენონ კურსის განმავლობაში მიღებული თეორიული და პრაქტიკული ცოდნა, სწორად და მიზანმიმართულად შეაგროვონ ინფორმაცია „პაციენტისგან“, ჩამოაყალიბონ დიაგნოზი, შეიმუშაონ და მენტორთან წარმოადგინონ მკურნალობის გეგმა.
ინტერაქტიული სესიები, რეალისტური სიმულაციები და უწყვეტი მენტორობა სტუდენტებს ეხმარება ჩამოყალიბდნენ ემპათიურ, კომპეტენტურ და პასუხისმგებლობით სავსე მომავალ ექიმებად.
„რამდენიმე წლიანი გამოცდილების საფუძველზე, დარწმუნებით შემიძლია ვთქვა, რომ PPS-კურსის თითოეული აქტივობის შემდეგ სტუდენტების აკადემიური და პიროვნული განვითარება აშკარად შესამჩნევია. მათი კლინიკური, კომუნიკაციური და პროფესიული უნარები, ისევე როგორც თავდაჯერებულობა და კომპეტენტურობა, მნიშვნელოვნად იზრდება. ყოველდღიურად მიღებული გამოცდილება - მათ შორის პრაქტიკული მუშაობა სიმულაციურ პაციენტთან, ინტენსიური კომუნიკაცია, ეთიკური საკითხების განხილვა და გუნდური დავალებების შესრულება, ეხმარება სტუდენტებს, როგორც მომავალ ექიმებს, აუცილებელი კომპეტენციების შეძენასა და დახვეწაში. სწორედ ეს გამოცდილება ამზადებს მათ რეალური კლინიკური პრაქტიკისთვის და აქცევს PPS-კურსს უნიკალურ და უაღრესად ღირებულ პროგრამად“- აღნიშნავს გვანცა ვარდოსანიძე.