კენ ვოლკერის საერთაშორისო უნივერსიტეტში გაიმართა აივ/შიდსის შესახებ ცნობიერების ამაღლების დღე, რომელიც მიეძღვნა შიდსის მსოფლიო დღეს. ღონისძიება ორგანიზებული იყო სტუდენტური კლუბის - კენ ვოლკერის სამედიცინო საზოგადოების მიერ და მიზნად ისახავდა დაავადების შესახებ ცნობიერების ამაღლებას, სტიგმის შემცირებასა და პაციენტების მიმართ სოლიდარობის გამოხატვას.
ღონისძიება ინტერაქტიულ ფორმატში ჩატარდა და სტუდენტებს შესაძლებლობა მისცა, აქტიური ჩართულობით გაეღრმავებინათ ცოდნა შიდსის პრევენციისა და გადაცემის გზების შესახებ. პროგრამა მოიცავდა საგანმანათლებლო თამაშებსა და დისკუსიებს, რომლებიც ხელს უწყობდა ღია დიალოგსა და კრიტიკული აზროვნების განვითარებას.
აქტივობებს შორის განსაკუთრებული ყურადღება დაეთმო სხვადასხვა ტიპის თამაშებს, მათ შორფის „ მითი თუ რეალობა“, „კითხვების ბორბალი“ და სხვა, სადაც მონაწილეები გავრცელებულ წარმოდგენებს ფაქტებზე დაყრდნობით აფასებდნენ. წითელი ლენტის აქტივობა კი გამოხატავდა პაციენტებისადმი სოლიდარობას.
როლური თამაშების მეშვეობით სტუდენტებმა იმსჯელეს მედიცინაში ემპათიისა და ეფექტური კომუნიკაციის მნიშვნელობაზე, რაც მათ მომავალ პროფესიულ პრაქტიკაში მნიშვნელოვან როლს შეასრულებს.
შიდსთან ბრძოლის საერთაშორისო დღის ფარგლებში დაგეგმილი აქტივობა განხორციელდა სხვადასხვა სტუდენტური კლუბების ჩართულობით (მათ შორის ტუტორთა და დებატების კლუბები), რაც კიდევ ერთხელ წარმოაჩენს სტუდენტური თანამშრომლობისა და სოციალური პასუხისმგებლობის მნიშვნელობას.
შიდსის შესახებ ცნობიერების ამაღლების დღე კვსუ-ში ნათლად აჩვენებს, თუ როგორ შეიძლება სტუდენტურმა ინიციატივამ ხელი შეუწყოს ცნობიერების ამაღლებას და პოზიტიურ ცვლილებებს.