კენ ვოლკერის საერთაშორისო უნივერსიტეტში წარმატებით გაიმართა სტუდენტური ინიციატივით ორგანიზებული გადაუდებელი დახმარების ვორქშოფების სერიის - „გადაარჩინე სიცოცხლე“- მეორე სესია, რომელმაც კიდევ უფრო გააღრმავა მონაწილეთა პრაქტიკული ცოდნა კრიტიკულ კლინიკურ სიტუაციებში მოქმედების მიმართულებით.
ტრენინგების სერია ორგანიზებულია კვსუ-ის სტუდენტური კლუბის - კენ ვოლკერის სამედიცინო საზოგადოების მიერ, უნივერსიტეტის სიმულაციის ცენტრთან თანამშრომლობით.
პროგრამის მიზანია სტუდენტებში ისეთი პრაქტიკული უნარების განვითარება, რომლებიც გადაუდებელ სიტუაციებში სწრაფი და ეფექტური რეაგირების საფუძველს ქმნის და პირდაპირ გავლენას ახდენს პაციენტის სიცოცხლის შენარჩუნებაზე.
მეორე სესია მოიცავდა გადაუდებელი დახმარების ერთ-ერთ ყველაზე მნიშვნელოვან მიმართულებებს:
• სისხლდენის მართვა - სისხლდენის სწრაფი იდენტიფიკაცია და ეფექტური კონტროლის ტექნიკები, რომლებიც კრიტიკულია სიცოცხლის გადასარჩენად;
• დამწვრობების მართვა - დამწვრობის ტიპების შეფასება და შესაბამისი პირველადი სამედიცინო დახმარება;
• სპორტული ტრავმების საწყისი მართვა - ტრავმების (დაჭიმულობა, მოტეხილობა) ადრეული შეფასება და პირველადი ჩარევა.
ტრენინგი ჩატარდა სიმულაციაზე დაფუძნებულ გარემოში, რაც მონაწილეებს საშუალებას აძლევდა პრაქტიკულად ემუშავათ რეალურ კლინიკურ სცენარებთან მაქსიმალურად მიახლოებულ პირობებში. აღნიშნული მიდგომა მნიშვნელოვნად ზრდის როგორც პროფესიულ თავდაჯერებულობას, ისე სწრაფი გადაწყვეტილების მიღების უნარს.
კვსუ-ის სიმულაციურმა ცენტრმა უზრუნველყო ტრენინგის მაღალი ხარისხით ჩატარება – თანამედროვე სიმულაციური აღჭურვილობით, პრაქტიკაზე ორიენტირებული სასწავლო გარემოთი, საგანმანათლებლო და ტექნიკური მხარდაჭერით, ასევე აქტიური ჩართულობით ვორქშოფის დაგეგმვასა და განხორციელებაში.
მთავარი გზავნილი უცვლელია - გადაუდებელ მედიცინაში ყოველი წამი გადამწყვეტია.
ვორქშოფის სერიის სრული კურსის დასრულების შემდეგ მონაწილეებს გადაეცემათ სერტიფიკატები, რომლებიც ადასტურებს მათ მიერ გადაუდებელი დახმარების პრაქტიკული უნარების წარმატებით ათვისებას.