საქართველოში ინდოეთის ელჩი, მისი აღმატებულება შრი ამიტ კუმარ მიშრა, ეწვია კენ ვოლკერის საერთაშორისო უნივერსიტეტს. ვიზიტი წარმოადგენს მნიშვნელოვან ნაბიჯს საელჩოსა და უნივერსიტეტს შორის თანამშრომლობის გაღრმავებისა და სტრატეგიული პარტნიორობის გაძლიერების მიმართულებით.
ვიზიტის ფარგლებში, მისი აღმატებულება შრი ამიტ კუმარ მიშრა შეხვდა ემორის უნივერსიტეტის მედიცინის სკოლის საგანმანათლებლო პროგრამების დირექტორს, პროფესორ არჩილ უნდილაშვილს, ასევე უნივერსიტეტის ადმინისტრაციას - რექტორს, პროფესორ ეკა ეკალაძეს, ადმინისტრაციის ხელმძღვანელს, ერეკლე კალატოზიშვილს და უნივერსიტეტის სხვა მნიშვნელოვან წარმომადგენლებს. შეხვედრაზე განიხილეს უნივერსიტეტის განვითარების სტრატეგიული მიმართულებები და საერთაშორისო თანამშრომლობის გაფართოების პერსპექტივები.
პროფესორმა არჩილ უნდილაშვილმა წარმოადგინა საქართველოში ემორის უნივერსიტეტის პროექტების მიმოხილვა აშშ–საქართველოს ურთიერთობების დასაწყისიდან დღემდე, მათ შორის კენ ვოლკერის საერთაშორისო უნივერსიტეტის დაფუძნებისა და განვითარების პროცესის მნიშვნელოვანი ეტაპები. პრეზენტაციაში განსაკუთრებული ყურადღება დაეთმო კვსუ-ის საგანმანათლებლო პროგრამების ძლიერ მხარეებსა და საერთაშორისო პარტნიორებთან მიმდინარე და დაგეგმილ ინიციატივებს, რაც კიდევ ერთხელ უსვამს ხაზს უნივერსიტეტის ერთგულებას გლობალური თანამშრომლობისა და აკადემიური ხარისხის მიმართ.
ვიზიტის დასასრულს, მისი აღმატებულება შრი ამიტ კუმარ მიშრა შეხვდა კვსუ-ის სტუდენტებს. შეხვედრის ფარგლებში ელჩმა ისაუბრა საქართველოში ინდოეთის საელჩოს როლზე, არსებულ შესაძლებლობებსა და მხარდაჭერის მექანიზმებზე. მან ხაზი გაუსვა განათლების მნიშვნელობას თანამედროვე სამყაროში და სტუდენტებს მოუწოდა, აქტიურად ჩაერთონ აკადემიურ პროცესში, საერთაშორისო გაცვლით პროგრამებსა და პარტნიორულ ინიციატივებში. სტუდენტებს ასევე დაუდასტურდათ საელჩოს მხარდაჭერა მათი პროფესიული განვითარების გზაზე.