კენ ვოლკერის საერთაშორისო უნივერსიტეტი განაგრძობს სოციალურ პასუხისმგებლობაზე ორიენტირებული ინიციატივების მხარდაჭერას, რომელთა მიზანია სასიცოცხლოდ მნიშვნელოვანი უნარების გაზიარება ახალგაზრდა თაობისთვის.
კვსუ-ის სიმულაციური ცენტრის ორგანიზებით, კერძო სკოლა „ოპიზას“ X კლასის მოსწავლეებმა მონაწილეობა მიიღეს გადაუდებელი დახმარების ტრენინგში.
კვსუ-ის მოწვეული ლექტორების - გვანცა ჯაჭვაძისა და ლუკა კუჭავას ხელმძღვანელობით, მონაწილეებმა მიიღეს როგორც თეორიული ცოდნა, ისე პრაქტიკული გამოცდილება გადაუდებელ სიტუაციებში ეფექტური რეაგირებისთვის.
ტრენინგის ფარგლებში მსმენელებმა შეისწავლეს გულ-ფილტვის რეანიმაცია (CPR), სისხლდენის ეფექტური კონტროლი და ჰაიმლიხის მანევრი (დახრჩობის შემთხვევაში დახმარების ტექნიკა).
განსაკუთრებული ყურადღება დაეთმო CPR-ს, როგორც კრიტიკულად მნიშვნელოვან უნარს. პრაქტიკული სესიები ჩატარდა ინტერაქციულ ფორმატში, რაც მონაწილეებს დაეხმარა ცოდნის პრაქტიკაში გამოყენებასა და თავდაჯერებულობის გაძლიერებაში.
ვიზიტი ასევე მოიცავდა უნივერსიტეტის სასწავლო გარემოსა და იმ შესაძლებლობების გაცნობას, რაც სტუდენტებს პრაქტიკული განათლების პროცესში ეძლევათ.
ტრენინგის მიზანი იყო მოსწავლეებში პასუხისმგებლობის, კრიტიკულ სიტუაციებში სწრაფი გადაწყვეტილების მიღებისა და ეფექტური მოქმედების უნარის განვითარება. აქტივობას სკოლის მხრიდან კოორდინაციას უწევდა ბიოლოგიის მასწავლებელი ნათია გაფრინდაშვილი.
კენ ვოლკერის საერთაშორისო უნივერსიტეტი მადლობას უხდის სკოლა „ოპიზას“ მოსწავლეებს აქტიური ჩართულობისა და ინტერესისთვის.