კენ ვოლკერის საერთაშორისო უნივერსიტეტში გაიმართა შეხვედრა „კავშირები მომავლისთვის“, რომელმაც უნივერსიტეტის სტუდენტებს შესაძლებლობა მისცა, უშუალოდ შეხვედროდნენ ადგილობრივი და საერთაშორისო ახალგაზრდული, პროფესიული, სამეცნიერო და საერთაშორისო ორგანიზაციების წარმომადგენლებს.
ღონისძიების მიზანი იყო სტუდენტებისთვის ახალი შესაძლებლობების შექმნა ინფორმაციის გაცვლის, პროფესიული კავშირების გაღრმავების, მომავალი თანამშრომლობის, მოხალისეობრივი აქტივობების, სტაჟირებებისა და პროფესიული განვითარების მიმართულებით.
შეხვედრის ფარგლებში სტუდენტებმა მოისმინეს მონაწილე ორგანიზაციების პრეზენტაციები, გაეცნენ მათ საქმიანობას, მიმდინარე პროექტებსა და იმ შესაძლებლობებს, რომლებსაც ეს ორგანიზაციები ახალგაზრდებს სთავაზობენ როგორც ადგილობრივ, ისე საერთაშორისო მასშტაბით .
ღონისძიებაში მონაწილეობდნენ: სტუდენტთა და ახალგაზრდა მეცნიერთა სამეცნიერო ასოციაცია (SYSSA), საქართველოს ახალგაზრდული ჯანმრთელობის ასოციაცია, ვოლტერ ე. დენდის ნეიროქირურგიული კლუბი - საქართველო, მედიბრიჯ გლობალ აკადემია, ახალგაზრდები საზოგადოებრივი ჯანმრთელობისთვის, ერასმუსის სტუდენტური ქსელი - საქართველო და კენ ვოლკერის სტუდენტური სამეცნიერო ასოციაცია.
ღონისძიება საკომუნიკაციო სესიით დასრულდა, სადაც სტუდენტებს შესაძლებლობა ჰქონდათ პირადად ესაუბრათ ორგანიზაციების წარმომადგენლებთან, დაესვათ კითხვები და დაემყარებინათ ახალი პროფესიული კავშირები.
შეხვედრამ სტუდენტებს მისცა შესაძლებლობა, გაეფართოებინათ პროფესიული წრე, გაცნობოდნენ ახალ შესაძლებლობებს და დაემყარებინათ კავშირები, რომლებიც მომავალში, შესაძლოა, მათი პროფესიული და პიროვნული განვითარების ნაწილად იქცეს.