2026 წლის 19 მაისს კენ ვოლკერის საერთაშორისო უნივერსიტეტმა უმასპინძლა „ჰორიზონტი ევროპა“ საქართველოს ეროვნული ოფისის საინფორმაციო დღეს, რომელიც უნივერსიტეტის აკადემიური პერსონალისა და მკვლევრებისთვის ევროპული კვლევითი და საგრანტო შესაძლებლობების გაცნობას ისახავდა მიზნად.
ღონისძიება გახსნეს უნივერსიტეტის რექტორმა, პროფესორმა ეკა ეკალაძემ და „ჰორიზონტი ევროპა“ საქართველოს ეროვნული ოფისის ხელმძღვანელმა, ლევან ხეცურიანმა. მათ ისაუბრეს საერთაშორისო სამეცნიერო თანამშრომლობის მნიშვნელობასა და ევროპულ კვლევით სივრცეში აქტიური ჩართულობის პერსპექტივებზე.
საინფორმაციო დღის ფარგლებში მონაწილეებს გააცნეს პროგრამა „ჰორიზონტი ევროპას“ ფარგლებში არსებული მიმდინარე და სამომავლო შესაძლებლობები, მათ შორის ჯანმრთელობის მიმართულების 2026 - 2027 წლების საკონკურსო პროგრამები, ინოვაციური ევროპის ფარგლებში დაფინანსების მექანიზმები და განვითარების შესაძლებლობები, ასევე WIDERA-ს მიმართულებით ევროპულ კვლევით სივრცეში ჩართულობის შესაძლებლობები და ძირითადი საკონკურსო მოთხოვნები.
შეხვედრის ფარგლებში მონაწილეებს შესაძლებლობა ჰქონდათ, უშუალოდ დაესვათ კითხვები და მიეღოთ პრაქტიკული ინფორმაცია იმ შესაძლებლობებზე, რომლებსაც „ჰორიზონტი ევროპა“ ქართველ მკვლევრებს სთავაზობს.
მსგავსი საინფორმაციო შეხვედრები ხელს უწყობს უნივერსიტეტში კვლევითი კულტურის გაძლიერებას, საერთაშორისო თანამშრომლობის განვითარებასა და ევროპული საგრანტო შესაძლებლობების მიმართ ცნობიერების ამაღლებას.