„ჰუმანურობის ერთი წვეთი. გაიღე სისხლი. გადაარჩინე სიცოცხლე“ – 14 ივნისს კვსუ-ის სტუდენტები კიდევ ერთხელ გაერთიანდნენ კეთილი საქმისთვის. ჰემატოლოგიის ინსტიტუტის სისხლის ბანკთან პარტნიორობით გამართულ სისხლის დონაციის აქციაში მონაწილეებმა საკუთარი წვლილი შეიტანეს სიცოცხლის გადარჩენის საქმეში და კიდევ ერთხელ დაამტკიცეს, რომ მცირე ჟესტსაც კი დიდი მნიშვნელობა აქვს.
სისხლის დონორთა მსოფლიო დღე პირველად 2004 წელს აღინიშნა, ხოლო 2005 წელს ის ოფიციალურად დაამტკიცა ჯანდაცვის მსოფლიო ორგანიზაციამ. თარიღი კარლ ლანდშტაინერის დაბადების დღეს უკავშირდება – ავსტრიელ მეცნიერს, რომლის მიერ ABO სისხლის ჯგუფების სისტემის აღმოჩენამ თანამედროვე ტრანსფუზიოლოგიის განვითარებას ჩაუყარა საფუძველი.
წლევანდელი მსოფლიო კამპანიის სლოგანია – „ჰუმანურობის ერთი წვეთი. გაიღე სისხლი. გადაარჩინე სიცოცხლე.“ სწორედ ამ იდეის გარშემო გაერთიანდნენ კვსუ-ის სტუდენტებიც, რომლებმაც სისხლის უანგარო დონაციით კიდევ ერთხელ გამოხატეს მხარდაჭერა მათ მიმართ, ვისაც ეს ყველაზე მეტად სჭირდება.
წელსაც, გასული წლების მსგავსად, კვსუ-ის სტუდენტები აქტიურად ჩაერთნენ სისხლის დონაციის აქციაში. მათ კიდევ ერთხელ აჩვენეს, რომ უნივერსიტეტის საზოგადოებისთვის ერთმანეთის მხარდაჭერა, თანადგომა და სოციალური პასუხისმგებლობა მნიშვნელოვანი ღირებულებებია.
ღონისძიების ფარგლებში მოეწყო საინფორმაციო სტუდენტური კუთხე, რომელიც კვსუ-ის სტუდენტური სამედიცინო საზოგადოების (Medical Society) ინიციატივით მოეწყო. კლუბის წევრები დონორებსა და სტუმრებს უზიარებდნენ ინფორმაციას სისხლის დონაციის მნიშვნელობის, დონორობის კრიტერიუმებისა და იმ რეალური გავლენის შესახებ, რომელსაც თითოეული დონაცია ადამიანების სიცოცხლეზე ახდენს.
ღონისძიების დასასრულს მონაწილეებს ჰემატოლოგიის ინსტიტუტის სისხლის ბანკისა და კვსუ-ის სტუდენტური მხარდაჭერისა და სერვისების სამსახურისგან სერტიფიკატები და საჩუქრები გადაეცათ.
განსაკუთრებით სასიხარულოა, რომ აქციაში მონაწილეობა წელსაც ბევრმა სტუდენტმა მოისურვა. კვსუ-ში სისხლის დონაცია უკვე ტრადიციად იქცა და ყოველწლიურად აერთიანებს სტუდენტებს საერთო მიზნის გარშემო – დაეხმარონ მათ, ვისაც ეს ყველაზე მეტად სჭირდება.
უნივერსიტეტი მომავალშიც განაგრძობს მსგავსი სოციალური და საგანმანათლებლო ინიციატივების ორგანიზებას და სიხარულით ელოდება ყველას, ვისაც სურს ამ კეთილ საქმეში ჩართვა. თუ ამჯერად ვერ მოახერხეთ დონორობა, აუცილებლად გელოდებით შემდეგ აქციებზე!