კენ ვოლკერის საერთაშორისო უნივერსიტეტში დაიწყო ნარატიული მედიცინის ლექციათა ციკლი, რომელსაც სტუდენტებისთვის ატარებს ემორის უნივერსიტეტის მედიცინის სკოლის გადაუდებელი მედიცინის ექიმი და სამედიცინო ტოქსიკოლოგიის პროგრამის მკვლევარი, თორი ერჰარდტი.
თორი ერჰარდტი კვსუ-ს ამერიკელი მოწვეული სპეციალისტის სტატუსით სტუმრობს. მისი ვიზიტის ფარგლებში სტუდენტები მონაწილეობენ სხვადასხვა აკადემიურ და პრაქტიკულ აქტივობაში, მათ შორის ნარატიული მედიცინის კურსში, რომელიც მცირე ჯგუფებში ტარდება.
კურსის მიზანია სტუდენტებს გააცნოს პაციენტის ისტორიისა და გამოცდილების მნიშვნელობა კლინიკურ პრაქტიკაში, განავითაროს ემპათიური კომუნიკაციის უნარები და ხელი შეუწყოს პაციენტზე ორიენტირებული მიდგომის ჩამოყალიბებას.
კურსის ფარგლებში სტუდენტები აანალიზებენ პაციენტების გამოცდილებებსა და კლინიკურ ისტორიებს, რაც მათ ეხმარება უკეთ გაიაზრონ პაციენტის პერსპექტივა და ექიმ-პაციენტის ურთიერთობის მნიშვნელობა. ლექციები ასევე მოიცავს დისკუსიებსა და აქტივობებს, რომლებიც თანამედროვე სამედიცინო განათლების საუკეთესო პრაქტიკებს ეფუძნება.
ნარატიული მედიცინის კურსი კვსუ-ის სტუდენტებს შესაძლებლობას აძლევს, სამედიცინო ცოდნასთან ერთად გაიაზრონ ემპათიის, ეფექტური კომუნიკაციისა და პაციენტის გამოცდილების მნიშვნელობა თანამედროვე მედიცინაში.