2026 წლის 29 ივნისს კენ ვოლკერის საერთაშორისო უნივერსიტეტსა და ერევნის მხითარ ჰერაცის სახელობის სახელმწიფო სამედიცინო უნივერსიტეტს შორის გაფორმდა სტრატეგიული თანამშრომლობის ჩარჩო შეთანხმება, რომელიც ორ უნივერსიტეტს შორის გრძელვადიან პარტნიორობას უყრის საფუძველს.
დოკუმენტს ხელი მოაწერეს ერევნის მხითარ ჰერაცის სახელობის სახელმწიფო სამედიცინო უნივერსიტეტის რექტორმა, პროფესორმა არმენ მურადიანმა და კენ ვოლკერის საერთაშორისო უნივერსიტეტის აკადემიური საბჭოს თავმჯდომარემ, პროფესორმა გორდონ ჩერჩვორდმა.
პარტნიორობის მიზანია სომხეთში ამერიკული სამედიცინო განათლების მოდელზე დაფუძნებული ახალი საგანმანათლებლო პროგრამის განვითარება კვსუ-სა და ემორის უნივერსიტეტის მრავალწლიანი გამოცდილებისა და აკადემიური თანამშრომლობის საფუძველზე.
თანამშრომლობის ფარგლებში მხარეები იმუშავებენ თანამედროვე, საერთაშორისო სტანდარტების შესაბამისი სამედიცინო განათლების განვითარებაზე. შეთანხმება ითვალისწინებს ინოვაციური სასწავლო პროგრამების შექმნას, სწავლებისა და შეფასების თანამედროვე მეთოდოლოგიების დანერგვას, ციფრული საგანმანათლებლო სისტემების გამოყენებას, აკადემიური პერსონალის პროფესიულ განვითარებასა და ხარისხის უზრუნველყოფის საერთაშორისო მექანიზმების გაძლიერებას.
პარტნიორობის ერთ-ერთი მთავარი მიმართულება იქნება ისეთი საგანმანათლებლო გარემოს შექმნა, რომელიც YSMU-ს სტუდენტებს ამერიკული სამედიცინო განათლების საუკეთესო პრაქტიკას გააცნობს, გააძლიერებს უნივერსიტეტების საერთაშორისო კონკურენტუნარიანობას და ხელს შეუწყობს USMLE-ზე ორიენტირებული თანამედროვე სამედიცინო განათლების განვითარებას.
კვსუ-ის დელეგაციას ერევანში ხელმძღვანელობდა ემორის უნივერსიტეტის საგანმანათლებლო პროგრამების დირექტორი, პროფესორი არჩილ უნდილაშვილი. დელეგაციის შემადგენლობაში ასევე იყვნენ ემორის უნივერსიტეტის მედიცინის სკოლის ჰემატოლოგიისა და სამედიცინო ონკოლოგიის დეპარტამენტის განათლების მიმართულების ვიცე-თავმჯდომარე, პროფესორი მერი ჯო ლეკოვიჩი და უნივერსიტეტის ადმინისტრაციის წარმომადგენლები.
კენ ვოლკერის საერთასშორისო უნივერსიტეტი განაგრძობს საერთაშორისო პარტნიორული ქსელის გაფართოებას და რეგიონში ამერიკული სტანდარტების სამედიცინო განათლების განვითარების ხელშეწყობას, რაც კვსუ-ის ინტერნაციონალიზაციისა და გლობალური აკადემიური თანამშრომლობის სტრატეგიის მნიშვნელოვანი ნაწილია.