8 ივლისს კენ ვოლკერის საერთაშორისო უნივერსიტეტმა ტაილანდის სამედიცინო სკოლების აღმასრულებელი საბჭოს (Medical School Executives – MSE) 38-კაციან დელეგაციას უმასპინძლა. დელეგაციის შემადგენლობაში შედიოდნენ ტაილანდის წამყვანი სამედიცინო უნივერსიტეტებისა და საუნივერსიტეტო კლინიკების დეკანები, ვიცე-დეკანები, დირექტორები, სამედიცინო განათლების ლიდერები და სხვა მაღალი რანგის წარმომადგენელი.
ეს ვიზიტი KWIU-ს საერთაშორისო აკადემიური თანამშრომლობის განვითარების მიმართულებით ერთ-ერთი ყველაზე მნიშვნელოვანი მოვლენაა. დელეგაციის წევრები წარმოადგენენ იმ პროფესიულ წრეებს, რომლებიც სამედიცინო განათლების ხარისხის განვითარებაზე, საერთაშორისო აკრედიტაციის სტანდარტების დანერგვასა და გლობალური აკადემიური თანამშრომლობის გაძლიერებაზე მუშაობენ.
ვიზიტორთა შორის იყვნენ სამედიცინო განათლების მსოფლიო ფედერაციის (WFME) სტანდარტების შემუშავების, შეფასებისა და ხარისხის უზრუნველყოფის პროცესებში ჩართული საერთაშორისო ექსპერტები, მათ შორის WFME Recognition Committee-ის წარმომადგენელი – პროფესორი პონგსაკ ვანაკრაიროტი.
ვიზიტის ფარგლებში სტუმრები გაეცნენ KWIU-ის ინფრასტრუქტურას, მისიას, ამერიკული სამედიცინო განათლების მოდელს, უნივერსიტეტის განვითარების სტრატეგიას, საერთაშორისო პარტნიორულ ქსელსა და იმ შესაძლებლობებს, რომლებსაც უნივერსიტეტი სტუდენტებსა და აკადემიურ პერსონალს სთავაზობს.
დელეგაციისთვის KWIU-ის საგანმანათლებლო ხედვა, განვითარების პრიორიტეტები და ამერიკული სამედიცინო განათლების მოდელის ძირითადი მახასიათებლები წარმოადგინეს არჩილ უნდილაშვილმა, ემორის უნივერსიტეტის მედიცინის სკოლის საგანმანათლებლო პროგრამების დირექტორმა, ეკა ეკალაძემ, კვსუ-ის რექტორმა და სხვა აკადემიურმა პერსონალმა.
შეხვედრის ფარგლებში განსაკუთრებული ყურადღება დაეთმო სამედიცინო განათლების ხარისხის უზრუნველყოფის თანამედროვე მიდგომებს, საერთაშორისო აკრედიტაციის მნიშვნელობას, გამოცდილების გაზიარებასა და მომავალი თანამშრომლობის პერსპექტივებს.
ვიზიტის დასასრულს ტაილანდის სამედიცინო განათლების ლიდერებმა KWIU-ში მიღებული გამოცდილება დადებითად შეაფასეს და სამომავლო თანამშრომლობის მზადყოფნა გამოთქვეს.
ტაილანდის სამედიცინო სკოლების კონსორციუმის გენერალურმა მდივანმა, ასოცირებულმა პროფესორმა ჯირუთ სრირატანაბანმა აღნიშნა, რომ KWIU-მ მათზე განსაკუთრებული შთაბეჭდილება მოახდინა:
„კენ ვოლკერის საერთაშორისო უნივერსიტეტში გავეცანით სამედიცინო განათლების განვითარების მყარ საფუძველს, ინოვაციურ სასწავლო პროგრამასა და სწავლების თანამედროვე მოდელს. ვფიქრობ, უნივერსიტეტს ბევრი აქვს გასაზიარებელი საერთაშორისო პარტნიორებისთვის და დარწმუნებული ვარ, მომავალში თანამშრომლობის შესაძლებლობებიც გვექნება.“
სამედიცინო განათლების აკრედიტაციის ინსტიტუტის დირექტორმა და სამედიცინო სკოლების აღმასრულებელი საბჭოს (MSE) პროგრამის ხელმძღვანელმა, პროფესორმა პონგსაკ ვანაკრაიროტმა ხაზი გაუსვა, რომ ვიზიტმა სრულად გაამართლა დელეგაციის მოლოდინი:
„ჩვენთვის დიდი პატივი იყო საქართველოს წამყვანი სამედიცინო უნივერსიტეტების მონახულება. KWIU-ში ვიზიტი ძალიან ნაყოფიერი აღმოჩნდა – გავუზიარეთ ერთმანეთს გამოცდილება სამედიცინო განათლების სფეროში, გავეცანით უნივერსიტეტის მართვის მოდელებს და მნიშვნელოვანი პრაქტიკული ცოდნა მივიღეთ, რომელიც ტაილანდში ჩვენი სამედიცინო სკოლების განვითარებაშიც გამოგვადგება. ვიზიტმა სრულად გაამართლა ჩვენი მოლოდინი და იმედი გვაქვს, მომავალში საქართველოს სამედიცინო უნივერსიტეტებთან თანამშრომლობას კიდევ უფრო გავაღრმავებთ.“
ტაილანდის სამედიცინო სკოლების აღმასრულებელი საბჭო აერთიანებს ტაილანდის წამყვანი უნივერსიტეტებისა და საუნივერსიტეტო კლინიკების ხელმძღვანელებს და წარმოადგენს ქვეყნის ერთ-ერთ ყველაზე გავლენიან პროფესიულ პლატფორმას სამედიცინო განათლების სფეროში. მსგავსი დონის დელეგაციის ვიზიტი კენ ვოლკერის საერთაშორისო უნივერსიტეტში კიდევ ერთხელ უსვამს ხაზს უნივერსიტეტის მზარდ საერთაშორისო ავტორიტეტს, ამერიკული სამედიცინო განათლების მოდელისადმი არსებულ ინტერესსა და კვსუ-ის აქტიურ ჩართულობას გლობალური სამედიცინო განათლების განვითარების პროცესში.