კენ ვოლკერის საერთაშორისო უნივერსიტეტში აკადემიური პერსონალისთვის პროფესიული განვითარების ფარგლებში ორდღიანი ტრენინგები გაიმართა, რომლებიც თანამედროვე სამედიცინო განათლების, სწავლების ხარისხის გაუმჯობესებისა და აკადემიური კეთილსინდისიერების გაძლიერებას მიეძღვნა.
ტრენინგების მიზანი იყო აკადემიური პერსონალის მხარდაჭერა თანამედროვე, საერთაშორისო სტანდარტებზე დაფუძნებული სწავლებისა და შეფასების მეთოდების დანერგვაში, ასევე ხელოვნური ინტელექტის პასუხისმგებლიანი გამოყენების პრაქტიკული უნარების განვითარება.
პირველი ტრენინგი – „თანამედროვე სწავლებისა და შეფასების მეთოდები უმაღლეს სამედიცინო განათლებაში“ – კვსუ-ის რექტორმა, პროფესორმა ეკა ეკალაძემ ჩაატარა. ინტერაქტიული ვორქშოფის ფარგლებში მონაწილეებმა განიხილეს შედეგებზე ორიენტირებული და კომპეტენციებზე დაფუძნებული სწავლების პრინციპები, კონსტრუქციული თანხვედრა, აქტიური სწავლების თანამედროვე მეთოდები, კლინიკური და პრაქტიკული უნარების სწავლების ეფექტიანი მიდგომები, ასევე სტუდენტთა ფორმაციული და სუმაციური შეფასების თანამედროვე მოდელები.
ტრენინგი მოიცავდა პრაქტიკულ აქტივობებს, მცირე ჯგუფებში მუშაობას, რეალური სასწავლო შემთხვევების განხილვასა და ტრადიციული ლექციის აქტიურ სასწავლო სესიად გარდაქმნის პრაქტიკულ სავარჯიშოებს. განსაკუთრებული ყურადღება დაეთმო შეფასების ინსტრუმენტების – ჩეკლისტების, რუბრიკებისა და ეფექტიანი უკუკავშირის – შემუშავებასა და გამოყენებას.
მეორე ტრენინგი – „აკადემიური კეთილსინდისიერება და ხელოვნური ინტელექტის პასუხისმგებლიანი გამოყენება სწავლებისა და შეფასების პროცესში“ კვსუ-ის ხარისხის უზრუნველყოფის სამსახურის უფროსმა, ნინო შიუკაშვილის ხელმძღვანელობით გაიმართა.
ვორქშოფის მონაწილეებმა შეისწავლეს ხელოვნური ინტელექტის ეფექტიანი გამოყენების შესაძლებლობები სასწავლო და შეფასების პროცესში, „Prompt Crafting“-ის პრინციპები, აკადემიური კეთილსინდისიერების თანამედროვე გამოწვევები და AI-ის ეთიკური, პასუხისმგებლიანი გამოყენების საერთაშორისო პრაქტიკა. ტრენინგი ინტერაქტიულ ფორმატში წარიმართა და მონაწილეებმა საკუთარი სასწავლო მასალების გამოყენებით იმუშავეს პრაქტიკულ დავალებებსა და ჯგუფურ აქტივობებზე.
პროფესიული განვითარების ინიციატივები კენ ვოლკერის საერთაშორისო უნივერსიტეტის აკადემიური განვითარების სტრატეგიის მნიშვნელოვანი ნაწილია. უნივერსიტეტი სისტემატურად ზრუნავს აკადემიური პერსონალის კვალიფიკაციის ამაღლებაზე, სწავლებისა და შეფასების თანამედროვე მიდგომების დანერგვასა და ინოვაციური საგანმანათლებლო პრაქტიკის განვითარებაზე, რაც სტუდენტებისთვის მაღალი ხარისხის სამედიცინო განათლების უზრუნველყოფას ემსახურება.