14 ივლისს Emory-MAEM & KWIU International Congress in Tbilisi-ის ფარგლებში კენ ვოლკერის საერთაშორისო უნივერსიტეტმა ემორის უნივერსიტეტის მედიცინის სკოლის დელეგაციას უმასპინძლა. დელეგაციას ხელმძღვანელობდნენ გადაუდებელი მედიცინის დეპარტამენტის თავმჯდომარე, პროფესორი დევიდ რაიტი, კლინიკური ტოქსიკოლოგიის განყოფილების ხელმძღვანელი, პროფესორი ბრენტ მორგანი, გადაუდებელ მედიცინაში გლობალური ჯანმრთელობის მიმართულების დირექტორი, ასოცირებული პროფესორი ანა იაფი და გადაუდებელი მედიცინის პროფესორი, საერთაშორისო სამედიცინო ტოქსიკოლოგიის ფელოუშიფის დირექტორი, პროფესორი ზიად კაზი. დელეგაციის შემადგენლობაში ასევე იყვნენ გადაუდებელი მედიცინის დეპარტამენტის პროფესორები, გლობალური ჯანმრთელობის პროგრამის წარმომადგენლები, მეცნიერები და ადმინისტრაციული გუნდის წევრები.
ვიზიტის ფარგლებში პროფესორმა არჩილ უნდილაშვილმა, ემორის უნივერსიტეტის საგანმანათლებლო პროგრამების დირექტორმა, წარადგინა პრეზენტაცია, რომელიც ემორის უნივერსიტეტსა და საქართველოს შორის 34-წლიან პარტნიორობას მიეძღვნა. მან მიმოიხილა მრავალწლიანი თანამშრომლობის ძირითადი ეტაპები, ერთობლივი პროექტები და პარტნიორობის მნიშვნელობა საქართველოში სამედიცინო განათლების განვითარებისთვის.
კენ ვოლკერის საერთაშორისო უნივერსიტეტის რექტორმა, პროფესორმა ეკა ეკალაძემ, სტუმრებს უნივერსიტეტის მისია, განვითარების სტრატეგია, ამერიკულ მოდელზე დაფუძნებული სამედიცინო განათლების პროგრამა, საერთაშორისო პარტნიორობები და სტუდენტებისთვის შექმნილი აკადემიური შესაძლებლობები წარუდგინა. პრეზენტაციის ფარგლებში განსაკუთრებული ყურადღება დაეთმო ხარისხზე ორიენტირებულ განათლებას, თანამედროვე სწავლების მეთოდებსა და საერთაშორისო სტანდარტების დანერგვას.
ვიზიტის ფარგლებში დელეგაცია შეხვდა უნივერსიტეტის ადმინისტრაციის წარმომადგენლებს, გაეცნო აკადემიური და ადმინისტრაციული დეპარტამენტების საქმიანობას, დაათვალიერა სასწავლო აუდიტორიები, კლინიკური უნარებისა და სიმულაციური სწავლების ცენტრი, სადაც თანამედროვე ტექნოლოგიებისა და პრაქტიკაზე დაფუძნებული სწავლების შესაძლებლობებს გაეცნენ.
კვსუ-ის გაცვლითი პროგრამის – Summer at Emory-ის მონაწილე სტუდენტებმა დელეგაციას პროგრამის შესახებ პრეზენტაცია წარუდგინეს. ლოლიტა ხალვაშმა და აბდულ აზიზ ხალლელულამ ისაუბრეს ემორის უნივერსიტეტში მიღებულ აკადემიურ გამოცდილებაზე, შეძენილ ცოდნასა და უნარებზე და იმაზე, თუ როგორ დაეხმარა პროგრამა მათ პროფესიულ განვითარებაში.
ვიზიტმა კიდევ ერთხელ დაადასტურა კენ ვოლკერის საერთაშორისო უნივერსიტეტსა და ემორის უნივერსიტეტს შორის არსებული მჭიდრო პარტნიორობა. მსგავსი შეხვედრები ქმნის გამოცდილების გაზიარების, აკადემიური დიალოგის გაღრმავებისა და ახალი ერთობლივი საგანმანათლებლო პროექტების განხორციელების საფუძველს, რაც სტუდენტებისა და აკადემიური პერსონალისთვის საერთაშორისო შესაძლებლობების გაფართოებას უწყობს ხელს.
კენ ვოლკერის საერთაშორისო უნივერსიტეტი Emory-MAEM & KWIU International Congress in Tbilisi-ის ადგილობრივი პარტნიორია. კონგრესი, რომელსაც ემორის უნივერსიტეტის Center for Advanced Emergency Care ხმელთაშუა ზღვის გადაუდებელი მედიცინის აკადემიასთან (MAEM) თანამშრომლობით 17 და 18 ივლისს თბილისში ატარებს, წარმოადგენს მნიშვნელოვან საერთაშორისო პლატფორმას გადაუდებელი მედიცინისა და კლინიკური ტოქსიკოლოგიის სფეროში. ღონისძიება ხელს უწყობს ცოდნის გაზიარებას, საერთაშორისო თანამშრომლობის გაძლიერებასა და სტუდენტებისა და ჯანდაცვის პროფესიონალებისთვის ახალი აკადემიური და პროფესიული შესაძლებლობების შექმნას.