კვირეულის ფარგლებში გამართული მორიგი ღონისძიება დაეთმო ვაქცინების უსაფრთხოების, მათი მნიშვნელობისა და სოციალური გავლენის განხილვას. გამართული სესიები გაჯერებული იყო როგორც პროფესიონალების გამოსვლებით, ასევე სტუდენტური პრეზენტაციებით, რაც ხელს უწყობდა ცოდნის გაზიარებასა და ღია დიალოგს. შეხვედრის განმავლობაში ექიმმა ნინო ნანავამ, კვსუ-ის პრეკლინიკური დეპარტამენტის ასისტენტ- პროფესორმა, ისაუბრა კიბოს საწინააღმდეგო ვაქცინებზე. მან აუდიტორიას გაუზიარა, თუ როგორ შეიძლება ვაქცინებმა ხელი შეუწყოს გარკვეული ტიპის კიბოს პრევენციასა და მასთან ბრძოლას. პროფესორმა, ექიმმა ნანი ყავლაშვილმა, რომელიც პედიატრიის კლერკშიფს ხელმძღვანელობს კვსუ-ში, ყურადღება გაამახვილა იმუნიზაციის შემდგომ არასასურველ მოვლენებზე (AEFIs) და მათ დროულ ამოცნობასა და მართვაზე. კვსუ-ის მოწვეულმა ლექტორებმა და გინეკოლოგებმა, თამთა თოლორდავამ და ქეთევან შენგელაიამ, წარადგინეს პრეზენტაცია ადამიანის პაპილომავირუსის ვაქცინაციის (HPV) თემაზე. მათ ხაზგასმით აღნიშნეს ამ ვაქცინის მნიშვნელობა საშვილოსნოს ყელისა და სხვა დაკავშირებული კიბოების პრევენციაში. კვსუ-ის მოწვეულმა ლექტორმა, ინფექციონისტმა ექიმმა, დავით ნიკოლაიშვილმა დამსწრეებს ვაქცინით პრევენცირებადი ბავშვთა დაავადებები გააცნო და ხაზი გაუსვა დროული იმუნიზაციის აუცილებლობას. ალისა წულაძემ, საზოგადოებრივი ჯანდაცვის სპეციალისტმა, ვაქცინაციისადმი უნდობლობის თემა წამოჭრა და ისაუბრა მის გავლენაზე საზოგადოებრივი ჯანმრთელობის პოლიტიკის მიმართ. გვანცა დადიანმა, ასევე საზოგადოებრივი ჯანდაცვის სპეციალისტმა, პრეზენტაციისას განიხილა ის სოციალური მიზეზები, რომლებიც საქართველოში ვაქცინაციის ტემპების შემცირებას იწვევს - მათ შორის დეზინფორმაციისა და ხელმისაწვდომობის პრობლემები.
ღონისძიებაზე სტუდენტური პრეზენტაციები მნიშვნელოვანი კომპონენტი იყო. კვსუ-ის სტუდენტებმა, ნავია ბალაჯიმ და სრუჰსტიმ წარმოადგინეს თემა „საიდან მოდის ვაქცინაციასთან დაკავშირებული მითები?” და განიხილეს დეზინფორმაციის წარმოშობის მიზეზები. პრაჯვალ ჰიმნეესჰ ნაიდუ სუნკარამ და ჰიმნიშ ნაიდუმ აუდიტორიას უამბეს, „რომელი ვაქცინებია აუცილებელი ბავშვობისა და ორსულობის პერიოდში” და მიმოიხილეს შესაბამისი ვაქცინაციის კალენდარი. რაკიია საიედმა კი ისაუბრა თემაზე „რელიგია და ვაქცინაცია” და აღწერა, როგორ შეიძლება რელიგიურმა რწმენებმა გავლენა მოახდინოს ადამიანების დამოკიდებულებაზე იმუნიზაციის მიმართ.
სტუდენტურმა პრეზენტაციებმა გააძლიერა მსჯელობა იმუნიზაციის მრავალმხრივ ასპექტებზე. როგორც მომავალი ჯანდაცვის პროფესიონალების ხედვები, ასევე მოწვეული ექსპერტების კლინიკური გამოცდილება ქმნიდა საფუძველს ცოდნის ინტეგრაციისა და კრიტიკული ანალიზისთვის.