კენ ვოლკერის საერთაშორისო უნივერსიტეტის პროფესორი ნინო ფირცხელანი ვიზიტით ეწვია ემორის უნივერსიტეტის მედიცინის სკოლას
სამუშაო ვიზიტის ფარგლებში პროფესორმა ნინო ფირცხელანმა შეხვედრები გამართა ემორის უნივერსიტეტის წამყვან აკადემიურ და სამეცნიერო პერსონალთან, მათ შორის პროფესორებთან პენგ ჯინთან, მაიკლ ჯ. გამბელოსთან, ქეთრინ გარბერთან და ნადია ალისთან. განხილვის მთავარი თემები ეხებოდა სამედიცინო გენეტიკის სწავლებისა და კვლევის თანამედროვე მეთოდებს.
პროფესორი ნინო ფირცხელანი დაესწრო ლექციებს, სემინარებს, პრაქტიკულ მეცადინეობებს და კლინიკური შემთხვევების განხილვებს, რითაც უშუალოდ გაეცნო ემორის უნივერსიტეტის ინოვაციური სწავლების მიდგომებს. ვიზიტის ფარგლებში იგი ასევე შეხვდა ემორის უინშიპის სიმსივნის ინსტიტუტის ასოცირებულ დირექტორს, ჰემატოლოგიისა და სამედიცინო ონკოლოგიის ფუნდამენტური კვლევების პროფესორ ლაურენს ბიოზეს.
აშშ-ში ვიზიტის ერთ-ერთი მნიშვნელოვანი ნაწილი იყო არტურ ბლანკის სახელობის ატლანტის ბავშვთა საავადმყოფო, სადაც კლინიკის სამედიცინო დირექტორმა, პროფესორმა სტეფანი ჯერნიგანმა, ქართველ კოლეგას გააცნო ცენტრის თანამედროვე ინფრასტრუქტურა და მაღალი სტანდარტების სამედიცინო მომსახურება.
ემორის უნივერსიტეტთან თანამშრომლობის ფარგლებში დაგეგმილია კვსუ-ის აკადემიური და ადმინისტრაციული პერსონალის არაერთი სამუშაო ვიზიტი აშშ-ში, რაც კიდევ უფრო გააუმჯობესებს სასწავლო პროცესის ხარისხს და ხელს შეუწყობს პერსონალის პროფესიულ განვითარებას.