„ზაფხული ემორიში“ პროგრამის ფარგლებში კენ ვოლკერის საერთაშორისო უნივერსიტეტის სტუდენტებმა მთელი დღე გაატარეს აშშ-ის ერთ-ერთ უდიდეს საჯარო სამედიცინო დაწესებულებაში – გრეიდის მემორიალურ ჰოსპიტალში.
ემორის უნივერსიტეტის გადაუდებელი მედიცინის გამორჩეული ექიმისა და სამედიცინო ტოქსიკოლოგის - პროფესორ ზიად კაზის ხელმძღვანელობით, სტუდენტებს საშუალება ჰქონდათ გაცნობოდნენ სასწრაფო და ტრავმული შემთხვევების მართვის მაღალდინამიკურ კლინიკურ გარემოს. ექიმმა კაზიმ სტუდენტებს დეტალურად აუხსნა გრეიდის გადაუდებელი დახმარების დეპარტამენტის, ტრავმული განყოფილებების, კრიტიკული სარეაბილიტაციო სერვისებისა და ტოქსიკოლოგიის სერვისების მუშაობის სპეციფიკა. ასევე, ისაუბრა, როგორ ფუნქციონირებს გრეიდი როგორც ტრამვისა და ონკოლოგიის წამყვანი დაწესებულება, რომელიც ატლანტის ჯანდაცვის სისტემის უმნიშვნელოვანეს რგოლს წარმოადგენს.
მოგვიანებით, სტუდენტებთან გამართულ სესიაზე ექიმმა კაზიმ ისაუბრა თავისი პროფესიული გზის, ამერიკული ჯანდაცვის სისტემის ხედვის, საგანმანათლებლო და კარიერული პერსპექტივების შესახებ. მან ჩვენს სტუდენტებს მნიშვნელოვანი რჩევები მისცა აშშ-ში სამედიცინო რეზიდენტურის გამოცდებისთვის მომზადებისა და რეზიდენტურაში აპლიკაციების წარდგენის შესახებაც.
სესიაზე განსაკუთრებული ყურადღება დაეთმო კვლევით შესაძლებლობებს აშშ-ში - ექიმმა კაზიმ სტუდენტებს შესთავაზა, აქტიურად ჩაერთვნენ სამეცნიერო პროექტებში, რაც ხელს შეუწყობს მათ აკადემიურ და პროფესიულ განვითარებას.
გრეიდის მემორიალურ ჰოსპიტალში მიღებული გამოცდილება კვსუ-ის სტუდენტებისთვის უნიკალური და ინსპირაციული შესაძლებლობა აღმოჩნდა ამერიკული კლინიკური პრაქტიკის უკეთ გაცნობისთვის.