კენ ვოლკერის საერთაშორისო უნივერსიტეტის სტუდენტებმა აშშ-ში, ატლანტაში პროგრამის - „ზაფხული ემორიში“- ფარგლებში დაგეგმილი საგანმანათლებლო მოგზაურობა განაგრძეს ჰრეიდის მემორიალური ჰოსპიტლის ტურით, რომელსაც ხელმძღვანელობდა ემორის უნივერსიტეტის მედიცინის სკოლის ინტერვენციული რადიოლოგიის დეპარტამენტის ასისტენტ-პროფესორი, ექიმი შონ დარიუშნია.
ექიმმა დარიუშნიამ სტუდენტებს გააცნო ინტერვენციული რადიოლოგიის დეპარტამენტი და მისი გუნდი, ასევე აჩვენა კლინიკური გარემო და სამუშაო კულისები. სტუდენტები პირადად დააკვირდნენ კლინიკურ პრაქტიკას და ფასეული წარმოდგენა მიიღეს იმ უმნიშვნელოვანესი როლის შესახებ, რომელსაც ინტერვენციული რადიოლოგია ასრულებს პაციენტთა მოვლაში.
ვენური დაავადებების, პორტული ჰიპერტენზიისა და მენჯის დარღვევების მიმართულებით კლინიკური გამოცდილების მქონე პროფესიონალმა, ექიმმა შონ დარიუშნიამ ასევე გაუზიარა სტუდენტებს გამოცდილება, რომელიც შეიძინა ინტერვენციული რადიოლოგიის საზოგადოების სტანდარტების გადახედვის ქვეკომიტეტის თავმჯდომარეობის რანგში, სადაც იგი დღემდე ხელმძღვანელობს ეროვნული ხარისხის გაუმჯობესების გაიდლაინების შემუშავებას.
აღნიშნული გამოცდილებამ კვსუ-ის სტუდენტებს არა მხოლოდ ინტერვენციული რადიოლოგიის უფრო ღრმა აღქმა შესძინა, არამედ საშუალებას მისცა, დაინახონ გუნდური მუშაობის შედეგები და მიდგომები, რომლებიც აშშ-ის ჯანდაცვის სისტემაში პაციენტთა სანიმუშო მოვლას განაპირობებს.
ინტერვენციული რადიოლოგია დღეს ერთ-ერთ ყველაზე მოთხოვნად სარეზიდენტო პროგრამად იქცა შეერთებულ შტატებში. ამ მიმართულებას ყოველწლიურად მედიცინის პროგრამის საუკეთესო კურსდამთავრებულები ირჩევენ. ეს სპეციალობა აერთიანებს კლინიკურ სამუშაოს, პაციენტთან უშუალო კომუნიკაციას, ტექნოლოგიურ ინოვაციასა და პროფესიულ შესაძლებლობებს - რაც მას ამერიკის ერთ-ერთ ყველაზე კონკურენტულ და დასაფასებელ რეზიდენტურად აქცევს.