გაცვლითი პროგრამის - „ზაფხული ემორიში“ - მიმდინარე აკადემიური სესიების ფარგლებში მონაწილე სტუდენტებს ჰქონდათ შესაძლებლობა, შეხვედროდნენ ექიმ თინათინ მურადაშვილს. მან ხაზი გაუსვა კვლევის მნიშვნელობას სამედიცინო განათლებაში, გააცნო სტუდენტებს სხვადასხვა პროექტებში მონაწილეობის შესაძლებლობები შეერთებულ შტატებში და ისაუბრა ჰემატოლოგიის საფუძვლებზე.
ამერიკაში წარმატებულ ქართველ ექიმთან შეხვედრის დროს სტუდენტებმა მათთვის საინტერესო კითხვები დასვეს, მათ შორის აშშ სამედიცინო რეზიდენტურის გამოცდების (USMLE-ის) მომზადებასთან, გასაუბრებასთან, ჩარიცხვის პროცესებთან და კვლევით პროექტებში მონაწილეობის შესაძლებლობებთან დაკავშირებით.
ექიმმა თინათინ მურადაშვილმა კვსუ-ის სტუდენტებს ასევე გაუზიარა საკუთარი გამოცდილება, თუ როგორ მოიპოვა სულ ახლახან სტიპენდია, რათა ემორის უნივერსიტეტში მიეღო სამეცნიერო ხარისხი კლინიკურ კვლევებში (Master of Science in Clinical Research, MSCR), და მოუწოდა მათ, ჰქონდეთ ამბიციური აკადემიური და პროფესიული მიზნები.
ამჟამად თინათინ მურადაშვილი ემორის უნივერსიტეტის მედიცინის სკოლის მეორე წლის ჰემატოლოგიის ფელოუა და პარალელურად აგრძელებს სწავლას კლინიკური კვლევის სამაგისტრო პროგრამაზე. მანამდე იგი წარმატებით ასრულებდა მთავარი რეზიდენტისა და შემდგომში ექიმის პოზიციას იელის უნივერსიტეტის შინაგანი მედიცინის რეზიდენტურის პროგრამაში, აშშ-ში. მისი სამედიცინო კარიერა დაიწყო საქართველოში, სადაც გაიარა ჰემატოლოგიისა და ჰემოტრანსფუზიოლოგიის რეზიდენტურა და მიიღო მედიცინის დოქტორის ხარისხი თსსუ-ში.
თინათინ მურადაშვილის მდიდარი გამოცდილება როგორც პაციენტების მოვლის, ისე სამეცნიერო კვლევის მიმართ, კვსუ-ის სტუდენტებისთვის იქცა საერთაშორისო წარმატების შთამბეჭდავ მაგალითად. სესიამ არა მხოლოდ გააფართოვა მათი ცოდნა სპეციალიზებული სამედიცინო სფეროების შესახებ, არამედ შესთავაზა მნიშვნელოვანი ხედვა ემორისა და სხვა წამყვან უნივერსიტეტებში არსებული აკადემიური, კლინიკური და კვლევითი შესაძლებლობების შესახებ.