ჩვენი პროგრამის -"ზაფხული ემორიში"-ფარგლებში, კენ ვოლკერის საერთაშორისო უნივერსიტეტის სტუდენტები შეხვდნენ ორ წარმატებულ ქართველ ექიმს, რომლებიც ამჟამად ამერიკის შეერთებულ შტატებში განაგრძობენ კარიერას: ნოდარ მაისურაძეს, ემორის უნივერსიტეტის კარდიოლოგიის ფელოუს, და ნიკოლოზ შეყილაძეს, ემორის უნივერსიტეტის ჰოსპიტალის ინტერვენციულ კარდიოლოგს.
შეხვედრაზე აშშ-ში წარმატებულმა ქართველმა ექიმებმა სტუდენტებს გაუზიარეს საკუთარი გამოცდილება - გზა თბილისიდან ემორის უნივერსიტეტამდე. მათ ისაუბრეს აშშ-ში სამედიცინო განათლების გამოწვევებსა და შესაძლებლობებზე.
ემორის უნივერსიტეტის ასისტენტ პროფესორი ნიკოლოზ შეყილაძე სპეციალიზდება გულის თანამედროვე ინტერვენციულ პროცედურებში, როგორიცაა სტენტების განთავსება და სარქველების აღდგენა. იგი, ასევე, აქტიურად უწევს მენტორობას მომავალ კარდიოლოგებს ემორის უნივერსიტეტში, რითაც მნიშვნელოვანი წვლილი შეაქვს დარგის განვითარებაში.
საქართველოში დიპლომირებული მედიკოსის ამერიკული პროგრამის დასრულების შემდეგ, 2019 წელს, ნოდარ მაისურაძემ კარიერა აშშ-ში განაგრძო და ნიუ-იორკში, SUNY Downstate Medical Center-ში შინაგანი მედიცინის რეზიდენტურაში ჩაირიცხა. რეზიდენტურის წარმატებით დასრულების შემდეგ, იმავე კლინიკაში უფროს რეზიდენტად მუშაობდა, რის შემდეგაც კარიერა ემორის უნივერსიტეტში კარდიოლოგიის ფელოუშიპში განაგრძო. ამჟამად ნოდარ მაისურაძე აქტიურად არის ჩართული ემორის ჰოსპიტლის კვლევით საქმიანობაში, მათ შორის პროექტში -„კლინიკური შედეგების კვლევა კორონარული არტერიის დაავადების მქონე პაციენტებში“.
ექიმების, ნიკოლოზ შეყილაძისა და ნოდარ მაისურაძის შრომისმოყვარეობისა და წარმატების ისტორიები ჩვენი სტუდენტებისთვის მოტივაციის მიმცემი აღმოჩნდა. ამგვარი შეხვედრები მათ მაგალითს აძლევს, რომ მონდომებითა და ერთგულებით საერთაშორისო წარმატების მიღწევა ნამდვილად შესაძლებელია.