დატვირთული დღეების შემდეგ სტუდენტებმა ატლანტას ღირსშესანიშნაობებიც მოინახულეს. რა თქმა უნდა, შტატებს ისე არ დატოვებდნენ, „კოკა-კოლას" პირველი ქარხანა - World of Coca-Cola და ჯორჯიის აკვარიუმი რომ არ მოენახულებინათ.
„კოკა-კოლას“ მუზეუმი ერთ-ერთი ყველაზე პოპულარული ტურისტული ადგილია ქალაქში, სადაც სტუმრები ბრენდის ისტორიას, კულტურას და უნიკალურ გემოს მსოფლიოს სხვადასხვა კუთხიდან ეცნობიან.
საინტერესოა ისიც, რომ „კოკა-კოლას" და ემორის უნივერსიტეტს ძალიან მჭიდრო კავშირი აქვთ. ემორის ტერიტორია 1915 წელს სწორედ „კოკა-კოლას“ პრეზიდენტის, ასა კენდლერისა და მისი ოჯახის შემოწირულობით გაჩნდა.
შემდგომშიც კომპანია და კენდლერის ფონდი მნიშვნელოვან ფინანსურ მხარდაჭერას უწევდა უნივერსიტეტს, რის შედეგადაც ემორი ერთ-ერთი წამყვანი კვლევითი და საგანმანათლებლო ცენტრი გახდა ამერიკაში. დღესაც, „კოკა-კოლა“ უნივერსიტეტის ერთ-ერთ მთავარ დონორად ითვლება და ემორის კამპუსი ხშირადაა დაკავშირებული ბრენდის ისტორიასთან.
ჯორჯიის აკვარიუმი კი მსოფლიოს ერთ-ერთი ყველაზე დიდი აკვარიუმია, სადაც ვიზიტორებს შეუძლიათ ვეშაპისებრი ზვიგენები, თეთრი ვეშაპები, დელფინები და სხვა ზღვის ბინადრები იხილონ. აკვარიუმი არა მხოლოდ გასართობი, არამედ საგანმანათლებლო და კვლევითი სივრცეცაა, რაც მას განსაკუთრებულ ადგილად აქცევს ატლანტაში.